Scores altes ladines: Confermades les trëi direziuns
Löm vërda dala Junta provinziala por les trëi direziuns dles scores altes ladines
Garantí la stabilité dl sistem dla scora paritetica y mantigní l’atrativité dles scores altes ladines inće tl dagnì: Chisc dui obietifs é gnüs confermá inier (31/03) dala Junta provinziala cun l’aprovaziun dl plann de destribuziun dl’oferta de istruziun y formaziun dles scores altes y direziuns tles valades ladines por i proscims cinch agn.
„Les trëi direziuns dles scores altes ladines á fat ti ultims cinch agn dër n bun laur y por garantí inant la stabilité dl sistem dla scora paritetica ladina únse tut la dezijiun da confermé le plann atual por i proscims cinch agn”, á dit l’assessur por la scora ladina Daniel Alfreider do che la Junta provinziala á aprové en mertesc, ai 31 de merz le plann teritorial de distribuziun dl’oferta de formaziun dles scores altes.
Insciö él gnü confermé les trëi direziuns cun les seziuns de secundo livel tles localités ladines (ITE Raetia y Lizeum d’Ert Cademia cun scora profescionala a Urtijëi y l’ITE cun lizeum a La Ila) por i proscims cinch agn cina le 2024/25. “La buna continuité dles iscriziuns desmostra che les scores altes ladines é atratives y garantësc n bun livel de formaziun. Orun jí inant sön chësc tru por otimisé ciamó deplü la formaziun adöm ales families”, insciö Alfreider.
“Avëi la poscibilité de frecuenté na scora alta de n bun livel tles valades ladines é na buna oportunité por nüsc studënc y nostes studëntes y sües families. Les scores altes ladines á n bun livel y pó lauré do prinzips dla personalisaziun y individualisaziun, propi deache i numeri le pormët”, dij la Intendënta Edith Ploner.
Cun l’aprovaziun da pert dla Junta él gnü confermé tl plann teritorial dles localités ladines la direziun dl Istitut Tecnich Economich „Raetia“ (cun les seziuns Aministraziun, finanza, marketing, Turism y Sport) y la direziun dl Lizeum d’Ert „Cademia“ (cun les seziuns Ert figurativa, Grafica y Design) cun la Scora profescionala por l’artejanat artistich (cun les seziuns Scoltöra y Pitöra decorativa). Implü él gnü confermé la direziun dl Istitut Tecnich Economich da La Ila (cun la seziun Aministraziun, finanzes y marketing) y cun le Lizeum (cun les seziuns Sciënzes umanes y Lingac). Por merit dl’organisaziun dles trëi direziuns él na pert dles leziuns dles seziuns desvalies che vëgn tignides adöm por düc i studënc y che comporta insciö n sparagn tres n’otimisaziun dles ressures dl personal insegnant a desposiziun.
La deliberaziun sön le plann teritorial dles scores altes ladines é gnüda aprovada da pert dla Junta provinziala do l’arat positif dla Seziun ladina dl Consëi scolastich provinzial y do la tuta de posiziun di ombolć dles valades ladines che á düc sostigní le mantignimënt dles direziuns dles scores altes ladines.
USP/rc
