Cultura ladina: Incuntada virtuala por analisé problematiches
Al é de plü problematiches che la defujiun dl coronavirus á porté para ince tl monn dla cultura locala. Te na sentada virtuala él gnü fat n'analisa dla situaziun.
Analisé la situaziun atuala, ti ciaré ales problematiches dl dagní y chirí soluziuns praticables: chisc é stá danter l'ater in fins dla incuntada virtuala dl assessur por la scora y cultura ladina Daniel Alfreider cun na seria de rapresentanc dl monn dla cultura ladina. “Te chësta situaziun che é nöia por düc él important da analisé les problematiches dl monn dla cultura por intergní spo tl dagní a na moda che les ativités culturales pois jí inant y che les porsones che laora te chësc monn ais la poscibilité da laoré”, dij l assessur Alfreider. An messará ciaré ti proscims mëisc da vire adöm al virus y da fá a na manira che ti seturs dl'ert, cultura y müjiga pois gní a se le dé les ativités, insciö Alfreider. “Les problematiches é tröpes y i ciarun da capí adöm ai rapresentanc da ciafé soluziuns”.
Les problematiches portades dant reverda da öna na pert la desdita de gran pert dles ativités preodüdes por i proscims mëisc. Sides conzerc, co ince mostres o d'atres ativités á messü gní desdites y an ciara sce al sará poscibl da organisé indo manifestaziuns por da d'altonn o bele ti mëisc da d'isté. I rapresentanc á chiló damané da stabilí regoles tleres por le dagní. Ince por ci che reverda la colaboraziun cun le monn dl'economia él gnü desmostré preocupaziuns, deache an ne sá nia sciöche le marcé respognará ala crisa.
Les opziuns mostrades sö é stades l ampliamënt de plataformes digitales, le sostëgn de formes culturales zënza contat personal sciöche por ejëmpl la publicaziun de libri o la composiziun de musiga. I rapresentanc é stá a öna da sostigní les ativités culturales ince te chësc tëmp te vigni forma poscibla.
Da pert dla Provinzia él gnü metü a desposiziun sciöche pröm vare n contribut una tantum de 600 euro por artistes y artisć che realisëia n proiet te na manira digitala. Les domandes pó gní presentades cina ai 29 de ma dl 2020. Implü él ince preodü tres l'aprovaziun dla lege provinziala nöia na seria de alisiraziuns tla rendicontaziun di contribuc y implü gnarál sostigní ativités preodüdes che an ne é nia stá bugn da realisé porvia dla defujiun dl coronavirus.
Ala sentada virtuala al tut pert Iaco Rigo por la lia “Ert por i Ladins”, Fabio Perathoner por la lia “Circolo – La mostra d Ert”, Konrad Tavella por “Badiamusica”, Rut Bernardi por la “Lia Autores Südtirol” y Filip Piccolruaz por l'artejanat artisisch de Gherdëina.
rc
