Stlüta di jus: Sorvisc strades al laur - Jus dl Sela y Frara deura
Le Sorvisc Strades laora por garantí la viabilité sön les strades. Le Ju dl Sela é da incö inant davert al trafich y al deura ince le Ju de Frara cun n orar smendrí.
Dötaurela vëgnel lauré da pert dl Sorvisc Strades por garantí la daurida di jus dala stlüta da d'invern. “Ince ti tëmps dl coronavirus él le Sorvisc Strades che garantësc vigni de la sigurté sön les strades tl Südtirol por ti dé la poscibilité a chi che mëss se möia y por i intervënc de pröm aiüt da podëi zircolé”, dij l'assessur por la mobilité Daniel Alfreider.
Tles ultimes ores á le Sorvisc Strades delibré la strada che porta sure le Ju de Frara dala tomada de lovines che é gnüdes jö en sabeda y domënia. La strada sura le Ju dl Frara sará daverta dales 21.00 ales 13.00. Tratan le domisdé messará gní stlüta porvia de prigo de lovines, spliga le diretur dl Sorvisc Strades, Philipp Sicher. Implü él sté meso da daurí por le trafich le Ju dl Sela zënza limitaziuns de orar.
Les strades resta ciamó stlütes por ci che reverda la pert da Börz tla direziun de Funes y i jus Rombo, Stelvio, Pennes y Staller Sattel. “Por ci che reverda chëstes strades sarál poscibl da les daurí sciöche ti agns denant por la fin de ma”, spliga Alfreider.
Atualmënter él le Sorvisc Strades che laora alado dles regoles prezises dades dant da pert dl Stat y dla Provinzia por antergní la defujiun dl coronavirus y por garantí la sigurté di lauranc y de döt le personal intressé.
san/rc
Galaria dales fotografies
