Coronavirus, da incö domanda de contribut por les pices impreses
Da incö domisdé pó les pices impreses fá domanda de contribut pro la Repartiziun Economia. An s’aspeta 20.000 domandes.
I piun ia incö (ai 21 d’aurí) cun les domandes de contribut por les impreses: incö pian ia dales 14 pó profescionisć lëdi y lauranti autonoms, impreses individuales y sozietés de porsones y capitai cun n’ativité de artejanat, comerz, sorvisc o hoteleria, sciöche afitaciamenes privac, presenté la domanda de contribut tres süa identité digitala SPID. L’obietif de chësc sostëgn dla prozedöra alisirada é da daidé i autonoms y les pices impreses superé chësc momënt de crisa. "Che che á albü n gran smendrimënt dl faturat porvia dla crisa dl coronavirus nü, pó sëgn s’anuzé dl sostëgn dla Provinzia por curí altamo na pert de sües spëises corëntes" stlarësc l’assessur provinzial por l'economia Philipp Achammer. A chësta moda dij Achammer "podunse garantí n’entrada minimala meton al sigü i posć de laur". Al á le dërt da gní sostigní che che á albü porvia dl coronavirus n smendrimënt dl faturat de altamo le 50% y á metü man cun süa ativité dan i 23 de forá dl 2020.
An s’aspeta 20.000 domandes. Stress-test de nöt
La Repartiziun Economia s’aspeta zirca 20.000 domandes. Por chësta rajun él gnü fat la nöt danter inier y incö na sort de stress-test che é jü bun. Les domandes de contribut mëss gní dades jö cina ai 30 de setëmber dl 2020. Les domandes pó gní dades jö dal rapresentant legal dl’impresa o da na porsona delegata. Te chësc caje vál debojëgn da ativé na delega tla seziun personala "Mie profil" sön le portal myCIVIS. lmplü vál debojëgn da arjigné ca n’identité digitala (SPID). De plü informaziuns y na soraodüda dles mosöres de sostëgn provinziales é da ciafé sön la plata web provinziala #ipiunindôiaSüdtirol.
ASP/sf
