Le trasport publich vëgn potenzié – al vëgn damané responsabilité
Bus: ai 4 de ma vel indô l'orar da vignidé nia scolastich. Assessur Alfreider: al pröm post él la responsabilité individuala, la proteziun di passajiers y la sconanza dl personal dependënt.
Deache al vëgn lascé do n valgönes mosöres de proteziun por archité la difujiun dl Coronavirus, é la Provinzia ince tl laur da aumenté i sorvisc de trasport publich, che ê denant gnüs limitá a n terzo de süa capazité originara. Dai 4 de ma inant él la maiú pert di bus che jará aladô dl orar nia scolastich di dis da laur y ai podará trasporté ma presciapüch le mez dles porsones che ess lerch, porvia dles mosöres de proteziun.
Restabilimënt dla mobilité tl Südtirol: al é da mëte averda ala sconanza dla sanité
"I orun indô garantí na majera mobilité tl Südtirol" se tol a dí Daniel Alfreider, assessur provinzial por la mobilité: "Por schivé vigni situaziun d'infeziun poscibla da Coronavirus, é la proteziun di passajiers y dles passajieres na priorité assoluta, sciöche ince chëra dl personal dependënt de chësc setur. Nüsc fins prinzipai é da garantí la puntualité di sorvisc, la segurëza dles porsones che vëgn trasportades y le destanziamënt sozial che ó ester". L'assessur ó ince fá n apel ala responsabilité individuala de dötes les porsones che se mët sön le iade. Ara jará ma da mëte man danü la vita soziala y de laur sce i se comportun cun respet ti confrunc di atri, i se tignun ales destanzes y i tolun dötes les precauziuns che vá debojëgn" dij Alfreider.
Ma porsones che respetëia les regoles pó adoré i mesi publics
Aladô dles diretives sön la segurëza dl Ministere di trasporc, mëss dötes les porsones che tol i mesi publics mëte averda a n valgönes cosses: vigni passajier/passajiera mëss se curí la bocia y le nes cun n injin individual adegué. Ti veicui pón ma da s'anuzé di posć lëdi cuntrassegná aposta a na moda da mantigní la destanza por se stravardé dal'infenziun. Tl momënt n'él nia a desposiziun posć da sté impé. Ti mesi de trasport mësson sté dainciará almanco un n meter un dal ater y ince intratan che an aspeta él da respeté chësta destanza. An ne pó nia cumpré les chertes sön i veicui, mo ares mëss bele gní cumprades danfora. "A che che n'á nia ciamó le Südtirol Pass ti aconsiunse da damané do, deache chësta cherta garantësc flessibilité y segurëza" dij Alfreider.
Schivé i tëmps de piza, ciaré da tó la roda
Sce al é tröpa jënt él damí da ne tó nia i mesi de trasport publics. Deache al pó ma senté sö intan de porsones pól ince vignitant gní dant che nia düc ne ciafes lerch. "Por chësta rajun analisunse tresfora la situaziun por aumenté te na manira flessibla y debota i sorvisc, ince por mirit de na bona colaboraziun cun i conzescionars" se tol a dí Alfreider: "Al ti gnará dé la prezedënza ales porsones che mëss jí a lauré". En general él da schivé i iadi che ne mëss nia ester y olache al é poscibl, dantadöt tles cités, messarán ciaré tl dagní da tó le plü che ara vá la roda.
Naota plü bus, spo plü iadi cun la ferata
Por le momënt jará indô i bus de cité y, cun ma püces ezeziuns, i bus interurbans de döt le Südtirol, sciöche ince la furnadoia dl Renun, aladô de n orar da vignidé. Al é ince gnü amplié le potenziamënt di sorvisc dla ferata dl Südtirol. I sorvisc dla ferata de Trenitalia gnará alzá dai 4 de ma cina presciapüch le 60% dl sorvisc normal dan dal virus y dai 18 de ma inant dessel sostanzialmënter gní pité le sorvisc deplëgn.
Por de plü informaziuns: http://www.suedtirolmobil.info/it
san/rc/sa
Galaria dales fotografies
