Stradon Tluses-Gherdëina: lëures tl tunel de Laion
N mierculdi à metú man l ressanamënt dl tunel de Laion cun la presënza dl assessëur Daniel Alfreider y l ambolt de Laion Stefan Leiter.
N merculdi, ai 20 de mei, à l assessëur provinziel per la mubiltà Daniel Alfreider y l ambolt de Laion Stefan Leiter giaurì i lëures dl tunel de 95 metri de Laion sun l stradon che mëina da Tluses te Gherdëina.
L stradon ie unì fat ti ani danter l 1968 y l 1970 y vën śën derturà cun de gran lëures de mantenimënt per garantì la segurëza y per l adaté ai bujëns dl trafich dal didancuei. L assessëur Alfreider à sotrissà: "Fajon lëures de ressanamënt de mpurtanza y de prëscia sun l stradon che cunliëia la Val dl Isarch cun Laion, Gherdëina y i jëufs dla Dolomites. Chisc lëures de mantenimënt, dantaldut chëi di tuniei y di puenc, ie fundamentei per garantì la cundizions de segurëza y l cunliamënt danter i luesc."
Lëures de ressanamënt y trafich desvià sun l stradon SS12
"I tuniei sun l stradon de Gherdëina ie bele mpue inant ti ani. Ti mënsc d'inviern se furmovel suvënz plates de dlacia periculëses". Per garantì la segurëza y per n bon cunliamënt danter Gherdëina y Laion cun la Val dl Isarch y l’autostreda A22 ie na modernisazion dl tunel perchël de gran mpurtanza sibe per i lauranc y i sculeies sibe nce per l turism" sotrissea nce l ambolt Leiter.
I lëures tl tunel de Laion reverda l renfurzamënt struturel tres iniezions che mplenësc i uec danter l tunel y l terac, cumedures di danns prinzipei, mbruciamënc y la realisazion de na curidura struturela armeda, la mpermeabilisazion dedite dl revëut, la drenaja y la desvieda dl’eghes coche nce la sostituzion dl mplant de iluminazion. L custimënt dl ntervënt de ressanamënt ie de ndut de 1,3 milions de euro; i lëures ie unic sëurandac ala mpreja de costruzion Goller Bögl y la direzion di lëures unirà fata da Roberto Giordani dl Ufize tecnich stredes Zënter-Sud. L diretëur dla Repartizion nfrastrutures Valentino Pagani nfurmea che ntan i lëures, bonamënter nchin ai 28 de lugio, sarà l trafich blocà sun l stradon SS 242 y desvià sun l stradon dl Prëner (SS12) y cundechël sun l stradon provinziel Pruca-Laion (SP 82).
san
