Impëgn volontar por l’assistënza da d'isté: Partezipaziun nezesciara
Ince sce al é la crisa Corona él ofertes da d'isté por mituns y jogn. Mo al n’é nia assá personal. L'assessur Achammer y l'assessur Alfreider spera che al sides porsones volontares danter le personal.
Te n valgönes edemes scomëncel les önesc edemes de vacanzes da d'isté por mituns y mitans, jogn y jones. Scebëgn che al é la crisa Corona él assoziaziuns y uniuns d'ütl publich che mët a jí, en colaboraziun cun cotan de Comuns, ofertes desvalies d'assistënza da d'isté. L'obietif é chël da ester bogn da garantí plü co mai l'assistënza ai mituns de geniturs che mëss lauré tratan le tëmp de vacanza.
Mo l'organisaziun é döt ater co scëmpla porvia dla situaziun d'emergënza Corona. Ara se trata da öna na pert dles desposiziuns de segurëza y proteziun rigoroses, a chëres che al é sambëgn da ponsé canche an cheriëia l'oferta. Y dal'atra pert se ghira le fat che i grups de mituns y jogn é da tigní pici ince d'isté de plü personal.
Tla situaziun de crisa confidunse tla solidarieté y tla coejiun
Por l'assistënza da d'isté vëgnel porchël chirí volontares y volontars che vëgn dal ciamp pedagogich che ó sostigní ativamënter nosta sozieté te chësc tëmp compliché. Al é gnü stlüt jö n'acordanza cun les organisaziuns sindacales de categoria: le personal pedagogich y insegnant dess s'anunzié de süa bona da dé na man tl ciamp dl'assistënza da d'isté por n tëmp limité, zënza che al vëgnes aziché le contrat coletif. Insciö él l'assessur Philipp Achammer y l'assessur Daniel Alfreider che inviëia le personal pedagogich, le personal insegnant de düc i liví de scora sciöche ince les pedagoghes soziales y i pedagogs soziai da s'anunzié por daidé fora i Comuns y les organisaziuns portantes, mo dandatöt les families che á debojëgn de n sorvisc d'assistënza da d’isté por sü mituns por podëi ti jí do a n laur.
Proiet: "Isté 2020: Nos fajun para"
"I sun otimisć che ara vais da ciafé tröpes porsones volontares", dij l'assessur Daniel Alfreider y stlarësc che: "Bele ma cun la desponibilité da surantó chësta inciaria volontara por n'edema sora vára da amplié l’assistënza da d'isté ti paisc." Dötes les colaboradësses volontares y düc i colaboradus volontars che dëida mëte a jí l'assistënza da d'isté vëgn assigurá dal'organisaziun portanta.
„I savun che döt le personal pedagogich y insegnant á fat n laur straordinar tles ultimes edemes”, á dit l’assessur Philipp Achammer y dij inant: “Te chësta situaziun de emergënza messunse damané do n segnal de solidarieté y de colaboraziun. I sun düc periá da dé n contribut de solidarieté y de responsabilité.”
Colaboraziun ince cun studëntes y studënc dla Facolté de Sciënzes dla Formaziun
I assessurs Achammer y Alfreider damana ince ales studentës y ai studënc dla Facolté de Sciënzes dla Formaziun dl’ Université Lëdia de Balsan da daié para tl’assistënza da d’isté. Al sará ince poscibl da damané che al vëgnes reconesciü l’assistënza da d’isté sciöche esperiënza de laur por le diplom Supplement.
Iscriziun por le sorvisc volontar
Pro le percurs de iscriziun dl sorvisc volontar vëgn i Comuns y les organisaziuns interessades sostignis dales Repartiziuns dla Scora ladina y todëscia. Che che ó anunzié so interes pó le fá dai 29 de ma inant scrion fora le formular che an pó ciafé chilò:http://www.provinzia.bz.it/formaziun-lingac/scora-ladina/la/iste-2020-nos-fajun-para.asp
Al vëgn damané da dé dant avisa la perioda de tëmp y le Comun, olache an ó fá le sorvisc. Les iscriziuns restará davertes cina mez jügn. Al foss de gran öga por dötes les organisaziuns y i Comuns da dé jö bele le formular cina ai 5 de jügn. Les listes cun les volontares y i volontars gnará tresfora ajornades. Düc i interessá gnará spo contatá dai Comuns.
Por de plü informaziuns: http://www.provinzia.bz.it/formaziun-lingac/scora-ladina/la/iste-2020-nos-fajun-para.asp
USP
