L’otava ediziun de Birba é danman: chësc iade éra dedicada ala forza
L'ediziun nöia de Birba trata la tematica dla forza. La novité plü grana é che la revista pó ince gní lita online.
La revista Birba, rovada a süa otava ediziun, gnará fora de jügn, por i scolars y les scolares dla cuarta y cuinta elementara. Na particolarité de chësc iade é, che ara vëgn ince metüda online y bonamënter ince inant tl futur, olache ara pó gní lita da scolares y scolars, mo sambëgn ince dai geniturs y dal publich interessé.
Chësc numer de Birba se dá jö cun le tema dla forza. Sides la forza fisica co la forza mentala o la forza d’orenté é gnüdes tutes en conscidraziun te aspec desvalis. Insciö él da ciafé sön les prömes plates, tl dizionar visif de vigni sort de parores che á da nen fá cun le tema: la forza de gravité, le alzé pëisc y tröc d’atri ejëmpli ti cater lingac: ladin, talian, todësch y ince por inglesc, dal momënt che tla IV. classa mët i scolars y les scolares man da imparé ince chësc lingaz.
Dai dërc dles ëres ala forza dla natöra: Tröpes tematiches
Inant vëgn traté temesc sciöche: la zentrala idroeletrica da Balsan, la forza fisicala, i tiers plü stersc dl monn, la forza muscolara y l’importanza dles calories por nosta forza corporala, la forza dla natöra y ince de “Frauenpower” – ó dí i dërc dles ëres y sües forzes combatives – se cuntará chësta ediziun de Birba. Intervistes a n verdabosch y n fisioterapist, che se cunta de tan de forza che an adora da fá chisc laurs, eserzizi, jüc, esperimënc completëia l’oferta didatica y ludica de Birba.
Les ilustradësses de MarameoLab, Maddalena Aliprandi, Manuela Dasser y Alice Dell’Antonio á indô ilustré plata por plata cun tröpa fantasia y dediziun. I tröc corusc y i dessëgns, adatá por mitans y mituns da scora ti dá tröpa vivazité ala revista. I links por podëi desćiarié y ciaré online Birba#8 é da ciafé sön www.pedagogich.it
USP
Galaria dales fotografies
