Presenté l’elaboraziun dl proiet mangé sann tles scolines
L’elaboraziun de n manual cun criters de cualité por le mangé sann, bun y natural tles scolines ladines é gnü presenté incö (19/06) a San Martin de Tor. Tl zënter la regionalité y produc locai.
Mangé sann, bun y natural é öna dles fondamëntes por le svilup dles mitans y di mituns bele dala nasciüda insö. Ci che les mitans y i mituns mangia y bër tles scolines condizionëia ince i comportamënc d’alimentaziun tratan la chersciüda. Porchël él la Direziun dles scolines ladines che metará da jí n proiet por elaboré n manual dal titul “Mangé sann, bun y natural tles scolines” sciöche fondamënta prinzipala pro la creaziun dl’oferta alimentara tles scolines. I contignüs dl proiet é gnüs presentá incö vëndres, ai 19 de jügn, a San Martin de Tor da pert dl assessur por la scora ladina Daniel Alfreider, dl’intendënta Edith Ploner adöm al’ispeturia dles scolines Elisabeth Baur,ala direturia Hannelore Insam y al‘esperta de alimentaziun Ivonne Daurú.
Daurú á presenté n chestionar fat dan da püch danter 284 geniturs dles scolines ladines y 50 colaboradus y colaboradësses pedagogiches cun le resultat da tigní tröp al mangé sann tles scolines. N aspet particolar pro i resultac é sté che i geniturs ti dá gran importanza ala cumpra de produc locai y biologics.
Le impuls da elaboré le manuel é gnü dal assessur Daniel Alfreider che á definí sciöche öna dles priorités di proscims agn la creaziun de n’oferta alimentara sana y sostenibla tles scolines y scores ladines. “Le mangé sann, adoran produc locai, é fondamental por le svilup dles mitans y di mituns. Dër prezius é te chësc contest che les mitans y i mituns impares da conësce la produziun locala di alimentars y la regionalité di produc. Implü él ince da lauré sön les normatives por podëi cumpré produc locai”, á dit Alfreider. I lüc da paurs, impreses locales y botëghes é aturs importanc por garantí la zircolaziun locala dles mangiares y ince sciöche partners por l’alimentaziun de scolines y scores, insciö l’assessur. Fondamentala é por Alfreider la colaboraziun cun i Comuns.
L’intendënta Edith Ploner á descrit spo i standarg de cualité pro l’elaboraziun dl manual: “I standarg fajará referimënt a criters scientifics y che tól en conscidraziun de plü seturs pro la seleziun y la cumpra di alimentars por ci che reverda la regionalité, i alimënc y la perioda de racoiüda di produc. D’atri criters é le comerz solidal y l’evitaziun de alimentars de produziun de massa.” Al é ince preodü da analisé chëstes tematiches: le cujiné sostenibl, spëises adatades ales mitans y mituns, la presentaziun dles spëises, i locai, l’organisaziun y la presentaziun di pasć y la sensibilisaziun por le mangé sann y sostenibl. N punt important é ince le sostëgn pro i vari che reverda la cumpra de produc locai.
La direturia dles scolines ladines Hannelore Insam á spo splighé i obietifs dl manual: “Le manual dess ester n aiüt por l’atuaziun pratica dl cujiné por les mitans y i mituns dles scolines. Al é insciö ponsé por cöghes, coghi por Comuns y dependëntes pedagogiches. I contignüs fajará insciö referimënt al’alimentaziun dles mitans y di mituns tles scolines.” I critérs de cualité gnará elaborá da n grup de laur de chël che al fej pert espers de alimentaziun sana, coghi y cöghes, colaboradësses pedagogiches, colaboradus pedagogics y rapresentanc di Comuns. Le manual gnará presentá ala fin dl ann de scolina y podará gní spo adoré por i proscims agn che vëgn.
Pro chësta ocajiun á l’assessur Daniel Alfreider surandé a vigni cöga y cogo dles scolines ladines n morin da majné graní por podëi cujiné cun farina integrala.
rc/san
Galaria dales fotografies
