Sorvisc provinzial Evaluaziun scores ladines: Direziun scrita fora
Cun na prozedöra de seleziun dess gní curida la störa de diretur/ia dl Sorvisc provinzial Evaluaziun dles scores ladines. La prozedöra é gnüda publicada sön le Boletin ofizial.
La direziun dl Sorvisc provinzial Evaluaziun dles scores ladines é gnüda scrita fora. La direturia dla Intendënza y cultura ladina Edith Ploner á fat pié ia la prozedöra de seleziun, che é gnüda publicada sön le Bolezin ofizial dla Regiun nr. 24 di 17 de jügn.
Por le post de laur pó ma fá domanda porsones che á le ladin sciöche lingaz dla uma. An mëss ince mostré sö esperiënzes y competënzes spezifiches tl ciamp dla valutaziun esterna y conësce l’organisaziun di prozesc de formaziun dles scolines, dles scores y dla formaziun profescionala dla Provinzia. Por tó pert ala seleziun pón fá domanda cina ai 16 de messé.
Al gnará tut sö por la seleziun le personal de rode dl’aministraziun provinziala o dles scores statales (ispeturs y ispeturies dles scores, direturs dles scores, insegnanc) y personal spezialisé atif tl ciamp dla inrescida y dla formaziun publica o privata.
D’atri criters de amisciun é le diplom de laurea o de n titul ecuiparé o en titul de laurea arjunt do almanco cater agn de stüde aladô dl ordinamënt vedl, y l’atestat de bi- y trilinguism.
Les domandes é da dé jö ala Intendënza y cultura ladina, tla strada Pinter 29 a Balsan, cun e-mail zertificada (culturayintendenzaladina@pec.prov.bz.it) o cun e-mail normala (ladinisches-schulamt@provinz.bz.it).
Por ciafé informaziuns y le formular de domanda: http://www.regione.taa.it/bur/pdf/IV/2020/24/BO/BO24200424569.pdf
rc
