Fisseda ai 20 de setëmber la data dla veles de chemun
L presidënt Arno Kompatscher à sotscrì l decret che fissa ai 20 de setëmber la veles de chemun. Sce l referendum unirà fat n la medema data unirà la veles slungedes nchin al di do, i 21 de setëmber.
La vela di ambolc y di cunsëies cumenei tla provinzia de Bulsan y tl Trentin unirà tenida n dumënia ai 20 de setëmber 2020. Sce l unissa a se l dé na vela dezijiva danter doi candidac ambolc unirà chësta fata ai 4 d’utober. L presidënt dla Region Trentin-Südtirol Arno Kompatscher à sotscrit ncuei (13 de lugio) l decret curespundënt.
Tl cajo che l Stat tulëssa la dezijion de tenì n i medemi dis l referendum cunfermatif dl tai di parlamenteres iel puscibl che la veles de chemun vënie slungedes nchin n lunesc 21 de setëmber. Te chësc cajo unirà tramendoi veles tenides tl medemo tëmp tla medema sëntes y cun i medemi orares.
La data per la vela direta di/dla cunselieres de zircoscrizion ti Chemuns de Bulsan, Trënt y Rurei ie sometuda ala medema regules che vel per la veles dl ambolt y dl cunsëi de chemun y la vën donca fisseda per i 20 de setëmber cun l slungiamënt puscibl nchin ai 21 de setëmbe.
Pervia dla situazion d’emergënza lieda al Coronavirus fova la vela che reverda 113 chemuns dl Südtirol y 158 chemuns dl Trentin, fisseda per i 3 de mei 2020, unida spusteda al tëmp danter l 1° de setëmber y i 15 de dezëmber 2020. Sce la veles messerà unì regulamentedes nce tla Region Trentin-Südtirol cun normes particuleres pervia dl Covid-19 uniral aplicà la medema regules sciche a livel naziunel.
fg
