Mosöres de sovenziun straordinares por artisć profescionisć lëdi
Da indoman podará i artisć profescionisć lëdi che é atifs tl Südtirol se anuzé de n secundo pachet de sostëgn de 2.000 euro. La Junta provinziala á stabilí i criters. N miliun é a desposiziun.
Do le pröm pachet de mosöres de sostëgn ala cultura cun l’aiüt ales artistes y ai artisć profescionisć lëdi de 600 euro, de chël che tröc artisć se á anuzé, él gnü dé pro n secundo pachet de mosöres de sostëgn. N setur che é scialdi gnü atoché dala pandemia dl coronavirus é sté chël artistich cun n smendrimënt ince dl davagn. Sön proposta di trëi assessurs por la cultura Daniel Alfreider, Philipp Achammer y Giuliano Vettorato él la Junta provinziala che á definí incö mertesc, ai 28 de lugio, n secundo pachet de mosöres.
Secundo pachet por artistes y artisć de düc i trëi grups linguistics de Südtirol
Por l’assessur por la cultura ladina Daniel Alfreider é chësta mosöra n vare implü por sostigní le laur de tröpes artistes y artisć che ie te n momënt de dificolté. “L’emergënza dl coronavirus ne á nia archité les idees y les creaziuns culturales y artistiches y insciö él mportant da ti dé n impuls por che are pois crësce y madorí inant”, á dit Alfreider.
“Cun chësc pachet de mosöres straordinares de 1 miliun de euro ó les trëi repartiziuns culturales y la Junta provinziala sostigní la cultura sciöche pert dl’economia creativa, mo dantadöt fá indô pié ia la vita culturala y artistica, che á patí tröp tratan chisc mëisc de crisa, olache ince les poscibilités de entrades economiches di artisć lëdi é stades dër limitades”, dij l’assessur por la cultura todëscia Philipp Achammer.
Por l’assessur por la cultura taliana Vettorato é chësta mosöra fondamentala por mantigní la gran richëza de ofertes culturales presëntes sön döt le teritore.
Domandes dai 29 de messé ai 29 de setëmber
La sovenziun straordinara é de 2.000 euro por artist/a. Le sostëgn, che amunta a 2.000,00 euro, mëss gní adoré por realisé scomenciadies culturales y artistiches, proiec culturai online o proiec creatifs (p.ej. proiec de produziun leterara da pert de auturs y auturies, proiec de composiziun da pert de musizisć y musizistes o ince proiec d’inrescida culturala).
La domanda pó gní dada jö da indoman mercui, ai 29 de messé cina ai 29 de setëmber 2020 pro la repartiziun culturala revardënta. I criters por podëi ciafé la sovenziun é i suandënc:
- La domanda pó gní presendata da artisć y artistes profescionisć/tes lëdi/es zënza contrat de laur dependënt sura 12 ores al’edema y che é atifs/atives te Südtirol da almanco dui agn tl ciamp ert performativa, musiga, ert figurativa, leteratöra y cinema y che fej l’ativité artistica tl teritore provinzial da almanco dui agn.
- L’ativité artistica de almanco dui agn mëss gní documentada tres la presentaziun de n curriculum vitae.
- Al é nezesciar da documenté da avëi realisé ti ultimi dui agn almanco dui proiec presentá al publich / döes publicaziuns al ann.
- Artisć profescionisć lëdi cun contrat de laur dependënt sura 12 ores al’edema o artisć en ponsiun y studënc/ studëntes é stlüc fora.
Sura le sostëgn economich fora, oress les trëi repartiziuns culturales y la Junta provinziala dé n segnal sterch por döt le panorama cultural dla Provinzia, daidan insciö la cultura da ciafé indô visibilité y da tó indô ite süa funziun tla vita soziala.
De plü informaziuns pon ince ciafé sot a: http://www.provinzia.bz.it/la/sorvisc-a-z.asp?bnsv_svid=1036144
USP
