De dl'Autonomia dl 2020, focus sön la natöra y contrada
Ai 5 de setëmber, aniversar dla sotescriziun dl’Acordanza de Paris, festejëia le Südtirol le De dl'Autonomia: chësc ann gnarál dediché ala sconanza dla natöra y dla contrada.
La sconanza dla natöra y dla contrada sará l’argomënt prinzipal dl De dl’Autonomia dl Südtirol ai 5 de setëmber. Sciöche vigni ann él gnü organisé n program de evënc che an pó consulté sön le portal aposta sön le sit dla Provinzia.
La jënt dl Südtirol é dër liá ala natöra y se crüzia dla contrada da munt cun mosöres de sconanza desvalies. Bele dai tëmps dl pröm Statut d'autonomia, canche al é gnü aprové la pröma lege provinziala sön la sconanza dla natöra, se crüzia la Provinzia dla sconanza dla natöra y dla contrada.
Ambasciadus dla contrada da munt
I set parcs naturai y le parch nazional dl Stelvio á sura le rode important de ambasciadú dl amur por la natöra, la biodiversité y la sconanza dla contrada da munt. Le De dl'Autonomia sarál presënt ince i mëmbri dla junta provinziala: le presidënt dla Provinzia y les assessuries y i assessurs provinziai vijitará ai 5 de setëmber les ciases di parcs naurai y s'incuntará sön le post cun la jënt.
Dötes les informaziuns y manifestaziuns dl De dl'Autonomia 2020 é da ciafé sön la plata internet dla Provinzia sön le portal web aposta http://www.provinzia.bz.it/de-autonomia/, che é online da en vëndres ai 14 d'agost incá. I placac dl De dl'Autonomia é da chësc ann da odëi te posć desvalis dla provinzia, sciöche ince tl palaz provinzial 1 sön la plaza Silvius Magnago a Balsan.
Le De dl'Autonomia
Ai 5 de setëmber vëgnel festejé tl Südtirol le De dl'Autonomia. Dl 1946 á le minister di afars cun l'ester austriach Karl Gruber y le presidënt di ministri talian Alcide Degasperi, sotescrit avisa ai 5 de setëmber le Tratat de Paris, che garantësc mosöres speziales por le mantignimënt dles cultures dl teritore, sciöche ince por le svilup economich y cultural, y rapresentëia na pera miliara por la strada devers dl’autonomia da sëgn.
san/ma
