De dla Scora Ladina: Scomenciamënt te na situaziun nöia
La tematica dl restart y didatica a destanza é stada tl zënter dl De dla Scora Ladina cun passa 400 partezipantes y partezipanc online.
Valurs de segurëza, partezipaziun y inclujiun: chisc é danter l’ater sentimënc importanc por scolares y scolars por le scomenciamënt dl ann de scora 2020/21 do le lockdown y la scora a destanza gnüda a se le dé porvia dl’emergënza coronavirus. Chisc é stá danter l’ater i temesc che é stá tl zënter dl De dla Scora Ladina organisé incö ai 31 de agost online sön MS-Teams. Al De dla Scora Ladina ál tut pert indöt 400 partezipantes y partezipanc, che é n bel suzes por le team che á organisé l’evënt.
L’assessur por la formaziun ladina á recordé tratan so intervënt che al se trata de na situaziun straordinara. “Al é na scora de vita cun na situaziun che ne vëgn nia dant te degun liber. Al é sfides che i afrontun adöm y i odun sëgn do le lockdown tan important che le monn dla formaziun y dötes les insegnantes y i insegnanc é. La scora é n elemënt prinzipal y essenzial por döta la sozieté, les families y les generaziuns che vëgn docá”, á dit l’assessur. La picera realté dla scora ladina pó ester n vantaje te chësta situaziun por afronté deboriada cun partezipaziun, positivité y energia i mëisc che vëgn. “Sciöche pro na tour da jí a arpizé, sce i se arjignun ca bun y piun ia cun crëta, spo podunse ince ti ester ai momënc de dificolté che gnará dessigü”, á dit l’assessur, che á rengrazié la direturia dl’Intendënza y Cultura ladina Edith Ploner Ploner y döt le team por le gran laur fat ti ultims mëisc.
L'intendënta Edith Ploner á spo sotligné che l’ann de scora 2020/21 sará n ann cun sfides nöies porvia dla situaziun che reverda le Covid-19. “Al sará n ann cun relaziuns personales, la didatica a destanza se á insigné tröp, mo ara á ince lascé sëgns de dificolté cun la disparité che é aumentada. I orun pié ia cun fidënza, crëta y creativité por jí zoruch le plü che ara vá ala normalité”, dij l’intendënta.
Le professur y primar dla Repartiziun Psichiatria dl Ospedal da Balsan, dr. Andres Conca á spo tigni le referat dal titul “Les conseguënzes dl’isolaziun tres le Covid-19 por i mituns y jogn. Ci adora pa mituns y jogn por podëi pié ia danü? Ci podunse pa nos fá por ëi?”. Le reladú á tematisé les teories modernes dla sozieté cun les problematiches dla velozité, de na confujiun nöia porvia dl’emergënza sanitara che á porté a na sort de “Stress-Test” por döta la sozieté y dantadöt ince por le monn dla formaziun. “La formaziun é n momënt relevant por la vita de nostes mitans y nüsc mituns y la stlüta de scores y scolines á porté a situaziuns de stress, de dificolté y de malsegurëzes”, insciö Conca. Le reladú a sotligné l’importanza por scolares y scolars cun reaziuns de stress fisich, psichich o sozial de avëi porsones de referimënt che trasmët faturs de segurëza, strotöres y sostëgn. La scora dëida da arjunje le bëgnester sce la relaziun cun les insegnantes y insegnac vëgn odüda sciöche positiva, i scolars sënt partezipaziun pro les dezijiuns, l’insegnamënt é bun, i compic ne é nia massa ris o sauris, le clima dla classa vëgn araté positif y che i geniturs se interessëia por la scora. N valur fondamental é la inclujiun te scora.
Scolines y scores ladines: 3.094 iscriziuns
Indöt é scrites y scric ite 3.094 mitans, mituns, scolares y scolars na scolina y scora ladina. 712 mitans y mituns jará te öna dles 17 scolines dles valades ladines, 1158 scolares y scolars jará tla scora elementara ladina y 680 te na scora mesana ladina. Tl ann de scora 2020/21 sarál 505 scolares y scolars che frecuentará na scora alta ladina y 39 la scora profescionala Cademia.
L'ann de scora metará man en lönesc, ai 7 de setëmber.
USP
