Inclujiun te scolina y te scora: n liber nü cunta la storia
Festejé y recordé la concuista dl’inclujun de dötes les mitans y i mituns te scolina y te scora: chësc é le fin prinzipal dl liber nü che é gnü presenté ai 29 de setëmber a Urtijëi.
Le liber dl Zënter de Competënza Inclujion y Consulënza dl’Intendënza ladina cunta la storia de passa 40 agn de integraziun tres les testimonianzes de 35 porsones, che é stades protagonistes dl’integraziun/inclujiun de chësc tëmp, sides te na funziun istituzionala, co sciöche geniturs o sciöche mituns y mitans cun handicap.
Tl liber vëgnel recordé da öna na pert ci che é döt cant gnü arjunt te chësc tëmp, dal’atra pert vëgn presentades les desfides y dificoltés che an á messé superé. Al vëgn documenté i tröc vari inant che an á fat y porté dant ci che é ciamó da fá.
Esperiënzes por jí inant cun l’inclujiun
"Chëstes testimonianzes y stories de inclujiun tla scora ladina, che ciafa na espresciun via te chësc liber tres esperiënzes personales dles families y di insegnanc, é de gran valur. Cun determinaziun jarunse inant sön chësta strada, dón n pëis particolar ai bojëgns de na pedagogia inclusiva, por che l'integraziun y l'inclujiun tla scora y tl insegnamënt pois tres indô gní svilupades inant" dij l’assessëur por la scora y cultura ladina.
Por l’intendënta Edith Ploner é chësc liber "n ciaré zeruch tl sëgn dla reconoscënza por la sensibilité che les persones che á lauré da impröma insö por mituns y mitans cun debojëgns particolars á desmostré y vit concretamënter."
Na pert dl liber dër interessanta é la testimonianza de Ida Lardschneider de Urtijëi, che á daurí trus nüs y che é jüda danfora ti pröms tëmps, canche l’integraziun ê ciamó te na fasa de scomenciamënt. "Cun chësc liber orunse ti lascé val’ a chi che vëgn do da nos, sciöche impuls, sciöche ispiraziun por jí inant sön chësc tru adincuntra a na sozieté plü iüsta por düc" dij Carla Comploj ala fin dl liber.
Tl sistem scolastich ladin é scric ite atualmënter tl ann de scolina y scora 2020/21 zirca 210 mitans y mituns cun handicap o cun dificoltés da imparé zertificades.
san
Galaria dales fotografies
