Premiazion y prejentazion dla sezion senior dl cuncors leterer Scribo
La premiazion y prejentazion dl'operes letereres de Ivan Senoner y Rut Bernardi ie unida a se l dé n sada ai 10 de utober 2020 dala 20.30 tla cësa de cultura Luis Trenker a Urtijëi.
Cun la cuntia “L Testamënt dl Lëuf “à Ivan Senoner venciù l prim pest pra la sezion senior dla cuarta edizion dl cuncors leterer metù a jì dala Aministrazion dla scola y cultura ladina. L segondo pest se à davanià Rut Bernardi cun l’opera “Vites scutedes via. Essays letereres.” Chësta doi operes ladines ie unides prejentedes n sada ai 10 de utober 2020 dala 20.30 tla cësa de cultura Luis Trenker a Urtijëi. I doi autores à te chësta ucajion prejentà si publiazions per l prim iede al publich.
La letura ie l plu gran recunescimënt
L assessëur per la scola y cultura ladina Daniel Alfreider à sotrissà te n videomessaje la mpurtanza dl crië leteratura. “Scrì y publiché per ladin ie n impuls per nosta rujeneda y n arichimënt per duta la cultura ladina. Per chësta rejon iel de mpurtanza sustenì operes letereres. “L merit ti va ai autores y ala autores che ti va do a chësta pascion “, nsci Alfreider. Ie son segur che i letëures aprijerà dassënn la publicazions y la lauda di letëures ie l plu gran recunescimënt per i/la scritëures.
Per la diretëura dl’Intendënza y Cultura Ladina Edith Ploner ie chësc cuncors n’ucajion per valorisé y svilupé la rujeneda tres scritëures che conta y scrij te n lingaz nia mé da uni di, ma che crieia leteratura che possa unì tramandeda y che resta tl tëmp. Nce la scoles à debujën de leteratura nueva che dà inò impulsc per scrì per ladin nce ai jëuni y ala jëunes.
“L Testamënt dl Lëuf “de Ivan Senoner
L prutagonist dl liber “L Testamënt dl Lëuf “de Ivan Senoner ie l jëun Roby che passa si dis samont dai nëinesc per ti judé tla ustaria da mont “Derjola”. Te si tëmp liede se urtel cun si cumpani Marc y ti mumënc de sulentum se tripel mpue massa cun l fonin. N bel di abina Marc na tle de n tublà sota n gran puron, canche l di do abini mo l cian di nëinesc mort y na zedula manacënta ficëda te tublà, devënta la storia mo plu ntravaieda. N thriller che purverà a dé na reposta a dumandes che chëi de Gherdëina ne se à mei nfidà a fé adaut.
“Vites scutedes via. Essays letereres.” De Rut Bernardi
L segondo pest se à davanià Rut Bernardi cun l’opera “Vites scutedes via. Essays letereres.” L’opera depënj la vita de cin persones che à passà na vita dut auter che cunvenzionela. Tlo se tratel dla vita dla muniga Maria Theresia Sanoner de Sëlva, dl ugrister y poet Matie Ploner de Urtijëi, dl’oma Rosalia Nogler de Sureghes, dla diretëura de scola Anna Maria Wanker da Bula y dl sëuravivù al’eutanasia Pepi Demetz de Urtijëi. La stories de vita ie ncherscëules, ntravaiedes, ma les da nce speranza, les ie vites vivudes ti tëmps scures de nosta storia y se merita zënzauter de unì lecurdedes. L’opera ie danter fantajia y realtà.
Rujeneda, cuntenut y uriginalità: La valutazions dla giuria
Pra la sezion senior iel de ndut unì dat ju nuef operes letereres che ie unides valutedes aldò dl lingaz, dl cuntenut y dl’uriginalità. La giuria metuda adum da Ingrid Runggaldier, Erika Castlunger, Theodor Rifesser, Cristina De Grandi y Elisabeth Kostner à auzà ora che l miëur lëur dal pont de ududa artistich ie l’opera de Ivan Senoner. “L’idea ie bona y nce l fil condutëur ie for tler. L autor se muev danter poejia, enigmes, fantajia y crimi. La maniera de coche la storia ie cunteda dà la sensazion de unì trac ite te chël che suzed, de viver pea la ntraunides, de vester leprò. La cuntia ie vijuela, frëscia y nce da rì y curespuend de plën ala carateristiches che l genre “fantasy” se damanda. L lingaz adurvà ie l ladin atuel di jëuni, scialdi autentich y da vivanda “nsci la giuria.
Pra l’opera de Rut Bernardi à la giuria recunesciù l valor dla nrescida storica y dl’uriginalià dla ncrujeda danter elemënc realistics y fantastics. L’autora ie stata bona de purté a lum na gran lingia de detai che à caraterisà la vites dla persunaliteies descrites y la ti à nsci dat forma y vivanda. La ncrujeda danter elemënc realistics y fantastics ie organica. L elëment fantastich ti dà la puscibltà al letëur/ala letëura de filé nstës inant si pensieres n cont di persunajes y si ntraunides.
I libri ie da garat tla biblioteca San Durich a Urtijëi da n lunesc, ai 12 de utober inant. La premaizion y prejentazion dla sezion junior dl cuncors unirà a se l dé mo chëst ann.
USP
Galaria dales fotografies
