Covid-19, campagna de sensibilisaziun por le respet dles regoles
Destanza, igiena, maschera. Chëstes é les parores prinzipales dla campagna de comunicaziun dla Provinzia por sensibilisé i südtirolesc da respeté les regoles.
La campagna de comunicaziun orüda dala Junta provinziala en colaboraziun cun l’Aziënda sanitara é piada ia. Le messaje prinzipal é chël da ponsé do sön les conseguënzes che le Covid-19 á sön la vita da vigni de y sön l’importanza da respeté les püces regoles tleres dades dant. Por la campagna él gnü chirí fora fotografies fates tratan le lockdown tl Südtirol y le messaje é tler: düc dess tigní adöm y respeté les regoles a na manira che an ne röies nia plü tla situaziun sciöche da d’aisciöda dl 2020. Al vëgn insciö damané da respeté les regoles che reverda la destanza danter les porsones, l’igiena dles mans y l’oblianza da adoré la maschera por curí bocia y nes.
“I sun düc cosciënc che le virus é na gran desfida por döta la sozieté, mo i sun sigü che cun l’impëgn de dötes y düc podun davagné chësta desfida”, dij le presidënt dla Provinzia Arno Kompatscher. Düc y dötes dess se comporté cun gran responsabilité, respetan les regoles, insciö Kompatscher. La campagna de sensibilisaziun reverda danter l’ater inserziuns ti foliec y placac sön les architades dles corieres. Al é preodü contignüs audio y video por comuniché ales zitadines y ai zitadins l’importanza dla partezipaziun de dötes y düc.
mb
Galaria dales fotografies
