Scolines y scores elementares, da en dedolönesc leziuns en presënza
Da en mertesc ai 24 de novëmber sarál indô les leziuns en presënza tles scores elementares. Al metará man ince les ativités en presënza tles scolines y tles strotöres de assistënza cina ai 3 agn.
La Junta provinziala á debatü incö domisde (ai 18 de novëmber) sön le scomenciamënt dles leziuns en presënza tles scores, scolines y strotöres de assistënza do les limitaziuns dl'edema passada. La Junta á tut la dezijiun che da en mertesc, ai 24 de novëmber, inant metará indô man les leziuns en presënza tles scores elementares dl Südtirol tl respet di protocoi de segurëza y de igiena. Les ativités didatiches y pedagogiches en presënza tles scolines piará ince ia en dedolönesc, sciöche ince les ativités tles strotöres de assistënza por i mituns cina ai 3 agn. Les classes de pröma mesana fajará inant didatica a destanza cina ai 29 de novëmber.
En lönesc ará insciö i Departimënc scolastics le tëmp da organisé la logistica por le scomenciamënt dles leziuns en presënza ince sön la basa di resultac di tesc asvelc dl fin dl'edema. Insciö gnarál monitoré la desponibilité de insegnanc y insegnantes vigni singuala scora ti Comuns plü atocá te döt le teritore provinzial. Al vëgn ince lauré dötaurela a na seria de tesć asvelc por le monn dla formaziun che podess insciö gní fac ti proscimi mëisc por garantí la sigurté sanitara de düc i interessá tl monn dla formaziun.
mb
