Ferates y corieres, orars nüs dal 13 de dezëmber inant
L’oferta di coliamënc dles corieres vëgn ampliada tl Südtirol ince por tigní ite les normes cuntra le coronavirus. De plü novités tles valades ladines.
De plü coliamënc cun les corieres da sëra, da doman y ti fins dl’edema, proiec nüs por la mobilité ti paisc y n per de ampliamënc por ci che reverda i coliamënc cun la ferata. Chisc é i punc zentrai dl orar 2021 dl trasport publich local (corieres y ferates) che jará en forza la secunda domënia de dezëmber y inann, por le pröm iade, en colaboraziun cun i zitadins. Ince porvia dles restriziuns y dles prozedöres da atué por archité la defujiun dl coronavirus él gnü adaté i orars.
“I un amplié l’oferta dl sorvisc dl trasport publich – sotlignëia l’assessur por la mobilité Daniel Alfreider – da öna na pert por amplié l’oferta cun les novités preodüdes dales normes de architamënt dl coronavirus, y dal’atra pert por mioré i coliamënc cun i paisc y les fraziuns ti Comuns. L’obietif prinzipal resta chël da adaté i orars di mesi publics ai debojëgns dles porsones che vir ti pici paisc y tles valades ince aldinfora di orars prinzipai”.
Informaziuns söl web y sön la App
Dötes les novités é desponibles sön la plata internet: http://suedtirolmubilta.info/
Implü él ince poscibl da desciarié la app sön la plataforma Google Play por düc chi che adora n sistem Android o sön la plataforma App Store por düc chi che adora iOS.
Les novités prinzipales dles valades ladines
N per de novités reverda ince les valades ladines. Por ci che reverda Gherdëna gnarál amplié le coliamënt cun les corieres te Gherdëna. La linia 350 (Balsan/Porsenú – Gherdëna) jará d’isté cina Plan de Gralba.
Por ci che reverda la Val Badia gnarál a se le dé n coliamënt diret linia 339 danter Antermëia, Börz y Funes. Al gnará potenzié le coliamënt dla linia 464 vigni ora danter Antermëia, Lungiarü y La Val y d’isté gnarál garantí n coliamënt diret dla linia 462 d’isté da Pederü cina Bornech.
mb/rc
Galaria dales fotografies
