Provinzia, tl 2020 chersciüda di azesc söl web y socials
Bilanz ala fin dl ann 2020 dl’Ajentöra Stampa y Comunicaziun dla Provinzia. Tl ann dla pandemia é i azesc söles plates internet y söi socials chersciüs cotan.
L’ann 2020 é sté n ann particolar ince por l’Ajentöra Stampa y Comunicaziun dla Provinzia. La noela plü nöia é le scomenciamënt dl laur da pert dla direturia nöia Claudia Messner. La pandemia á porté para de plü novités ince por ci che reverda les ativités “tradizionales” dla Ajentöra cun de conseguënza n raforzamënt di canai de comunicaziun direc cun la popolaziun.
Plata internet dles noeles, azesc chersciüs de prësc 300 %
Te n ann é les plates visualisades dl portal news dla Provinzia, http://www.provinzia.bz.it/news/la/, chersciüdes de prësc 300 porcënt, passan da 864.000 a 3.350.000 visualisaziuns. Ince i anuzadusc y les anuzadësses é chersciüdes: passan da 220.000 tl 2019 a passa 650.000 tl 2020. Les informaziuns plü damanades é stades dantadöt chëres che reverda la pandemia gaujiada dal Covid-19. Les ativités dla Junta y dl’Aministraziun provinziala é gnüdes documentades da passa 3.350 comunicac stampa cun 170 conferënzes stampa organisades en gran pert te forma digitala tres la plataforma Zoom. Al é chersciü de cotan i social media dla Provinzia, dantadöt les plates Facebook dla Provinzia (ladin, todësch y talian) passan da 27.000 abonamënc a prësc 50.000 abonamënc.
Organisaziun nöia por l’Ajentöra
Dal punt de odüda aministratif é l’Ajentöra Stampa y Comunicaziun organisada sëgn te dui ofizi: l’Ofize Stampa (diretur Guido Steinegger) y l’Ofize Relaziuns cun le publich (direturia Susanna Salvaterra) che á coordiné 15 campagnes de comunicaziun tratan l’emergënza dl coronavirus. “Te na perioda caraterisada da n aumënt dles noeles él fondamental che les fontanes ofiziales pites ai zitadines y ales zitadines informaziuns verificades y ofiziales”, sotlignëia Claudia Messner. Al ne é nia ma le compit da informé i media, mo ince i zitadines y les zitadines dess gní informá te na forma dërta, cun trasparënza y cun informaziuns ajornades. Y te chësta direziun jarará ince inant tl 2021 cun novités ince por ci che reverda la revista LP y campagnes de comunicaziun nöies.
mb
Galaria dales fotografies
