Dagní dl’Euregio:De plü partezipaziun di zitadins, denominaziun ladina
Tla sentada en videoconferënza á la Junta dl GECT ince definí la denominaziun ofiziala por ladin dl’Euregio. Le tema prinzipal é sté la partezipaziun di zitadins y Comuns.
La Junta dl GECT dl’Euregio Tirol – Südtirol – Trentin s’á incunté incö ai 18 de jená te na videoconferënza cun danter l’ater le presidënt dl Tirol Günther Platter (cun le Land Tirol che atualmënter á la presidënza dl’Euregio), le presidënt dla Provinzia Arno Kompatscher y le presidënt dl Trentin Maurizio Fugatti.
“Tratan la sentada un albü la ocajiun da ne traté nia ma la tematica dla pandemia, che atoca düc nüsc raiuns y döt le monn, mo ince da fá vari inant por ci che reverda proiec importanc por l’Euregio”, á dit Günther Platter. Al é insciö gnü elaboré na convenziun nöia y n statut nü sön la basa dles propostes dl’EuregioLab. Aladô dla proposta elaborada ince dal espert de dërt europeich, Walter Obexer, sará l’assemblea dl’Euregio formada da nü comëmbri sön 15 che gnará stabilis dai consëis. Al gnará ince a se le dé na maiú partezipaziun da pert dl podëi esecutif. N maiú pëis ará ince i aconsiadus provinziai inciariá che ará la funziun de direturs tecnics sön inciaria dla Junta.
Partezipaziun di zitadins por le svilup dl’Euregio
“N ater punt fondamental por le dagní sará na maiú partezipaziun dles zitadines y di zitadins dl’Euregio por ci che reverda le svilup dl’Euregio”, á dit Platter. Al dess gní formé consëis de zitadins cun rapresentanc dla popolaziun cun la poscibilité da fá propostes sön tematiches spezifiches. Les condiziuns nöies dl GECT prevëiga ince n rode plü important di Comuns tres n “Consëi de consultaziun dl’Euregio”. Chësc consëi dess gní istituí en colaboraziun cun le Consorz di Comuns por da d’altonn dl 2021. “La partezipaziun di zitadins, di Comuns y le renforzamënt di parlamënc é elemënc de gran valüta por che l’Euregio sides ciamó plü viüda y sintida da pert dla popolaziun”, á dit le presidënt Arno Kompatscher. Sëgn sará la Talia y l’Austria che analisará les mudaziuns fates da pert dla Junta dl’Euregio y la firma ofiziala ai statuc nüs dess gní fata tratan le De dl Tirol al Forum Alpach tl 2021.
Denominaziun ofiziala por ladin y ann di museums
La Junat dl GECT á ince aprové l’introduziun dla denominaziun ofiziala dl’Euregio por ladin y che é “Lia Europeica de Cooperaziun Teritoriala Euregio Tirol-Südtirol-Trentin“, tla forma cörta “Euregio Tirol-Südtirol-Trentin“. Na tematica tratada é ince stada la preparaziun al ann di museums dl’Euregio cun la daurida de 60 museums por ma dl 2021. Löm vërda ince ai dui ofizi nüs de informaziun y coordinamënt a Trënt y Desproch che dess mioré le raport dl’Euregio cun sü zitadins.
ASP
