Tesć covid tles scores: apel dla Junta por la colaboraziun
I trëi assessurs por la formaziun fej n apel por la colaboraziun a volontars y personal sanitar en ponsiun, por podëi fá plü tesć tles scores.
Les scores respidlëia la situaziun de infeziuns dla sozieté. Insciö é ince le numer de infeziuns tles istituziuns scolastiches jü sö tles ultimes edemes . Porchël dessel sëgn gní fat plü tesć tles scores, por podëi tigní damí la situaziun sot a control. Por fá chësc ne bastel nia le personal che è por le momënt en sorvisc. Por fá plü tesć che ara vá, tles scores ladines, todësces y talianes de döta la Provinzia, á insciö la Junta provinziala damané la colaboraziun de doturies y doturs, infermieres y infermiers volontars o en ponsiun.
Cun n apel ó i trëi assessurs por la formaziun Daniel Alfreider, Philipp Achammer y Giuliano Vettorato damané la colaboraziun de personal sanitar volontar o en ponsiun: “I adorun, pornanche ara vá, personal spezialisé tl ciamp sanitar por pié ia cun na linia de tesć tles scores altes, mo ince tles elementare y mesanes. I damanun a doturies y doturs, infermieres o infermiers volontars o en ponsiun da se daidé da fá chisc tesć sön le post ai scolars y ales scolares”. I trëi assessurs é sigüsc: vigni ressursa de tëmp metüda a desposiziun por daidé mituns y jogn da ti garantí l’insegnamënt en presënza, é preziosa.
Les porsones interessades che á les cualifiches profescionales, pó comuniché süa desponibilité ala Intendënza y cultura ladina: intendenza-ladina@provinzia.bz.it. Al vëgn damané chisc dac: l’inom, la misciun, le numer de telefon o la misciun mail, l’indicaziun dl comun, dla valada o dla scora olache la porsona interessada oress daidé para. Deplü informaziuns gnará spo dades diretamënter ai interesciá, en colaboraziun cun l’aziënda sanitara.
eb/tl
