Le vizepresidënt Alfreider sön la mort de Carlo Willeit
Le vizepresidënt dla Provinzia Daniel Alfreider sotlignëia i miric y les arjuntes dl rapresentant politich Carlo Willeit che á fat tröp por le svilup dla cultura y rapresentanza ladina.
En lönesc sëra (29 de merz) él mort le rapresentant politich ladin Carlo Willeit tl’eté de 78 agn. Willeit, nasciü te Mareo, é sté por 10 agn n comëmber dl Consëi provinzial y dl Consëi regional y s’á tres de da fá por i dërc dl grup linguistich ladin tl Südtirol y tl Trentin. Al é sté un di fondadus dla “Comunanza Ladina a Bulsan” y dal 1983 al 1986 presidënt dla Union Generela di Ladins dla Dolomites. Tl 2017 él gnü nominé sciöche presidënt d’onur dla Generela. Willeit é sté dal 1993 al 2003 comëmber dl Consëi provinzial de Balsan y dl Consëi regional dl Trentin-Südtirol.
L’assessur ladin Daniel Alfreider sotlignëia i miric y les arjuntes de Carlo Willeit por le grup linguistich ladin y so contribut fondamental por la cultura ladina di ultims dezenns. “Carlo Willeit á tres porté inant les ghiranzes por renforzé i dërc dl grup lingustich ladin. Al s’á dé da fá por na rapresentanza plü ampla tles aministraziuns publiches y ti organs politics. Implü él sté d’impuls por scomenciadies culturales nöies, sciöche le festival Cianta cun nos”, dij Alfreider.
rc
