Tesć nasai, Kompatscher sön la dezijiun dl Tar
Le Tar á sciuré zoruch la domanda de sospenjiun por l’oblianza di tesć nasai. Dí de sce al screening é recuisit por les leziuns en presënza.
La seziun da Balsan dl Tribunal aministratif regional á inier (8 d’aurí) sciuré zoruch la domanda de n grup de geniturs che ghirâ la sospenjiun dl’oblianza di tesć nasai por podëi tó pert al insegnamënt en presënza. Porchël resta en forza les regoles da sëgn, che vëiga dant le consëns al screening por les scolares y i scolars che ó indô jí indô zeruch te tlassa. La chestiun gnará indô tratada ai 27 d’aurí.
Le presidënt dla Provinzia, Arno Kompatscher, tol sö cun sodesfaziun la dezijiun dl Tar y fej n apel ala calma: “L’obietif de chëstes mosöres é ma chël da garantí les leziuns en presënza a scora, che pois duré por n tëmp plü lunch che ara vá. Por arjunje chësc gran resultat bastel n pice contribut, che é chël da tó pert ai tesć. Te n momënt tan rî sciöche chësc, messunse ciaré da ciafé indô n sentimënt sterch de comunité, che pó se concretisé propi tl respet dles regoles che se dëida düc canc da se sconé. I arati che al sides l’unica strada por podëi superé chësta pandemia.”
red/mb
