Jus dles Dolomites: Memorandum suraregional por la mobilité
De plü mobilité sostenibla sön i jus dles Dolomites é le fin de na convenziun danter la Provinzia de Balsan cun les Provinzies de Trënt y Belun y la Regiun dl Veneto. La Junta á dé löm vërda.
Por i Jus de Frara, Sela, Ciaulunch y Pordoi él les Provinzies de Balsan, de Trënt y de Belun y la Regiun dl Veneto che á elaboré n conzet de mobilité sostenibla y suraregionala adöm ai Comuns de Corvara, de Sëlva, de Cianacei y de Fodom. Tl zënter dl conzet él la sostenibilité. La Junta provinziala á aprové incö (13 de aurí) la proposta dl assessur por la mobilité Daniel Alfreider n protocol de acordanza. Tl protocol él planifiché n management dla mobilité tres sistems integrá cun la posscibilité da monitoré y manajé le trafich söi jus cun le fin da smendrí l’incuinamënt acustich y ambiental y ti dé plü valur insciö a döt le raiun dles Dolomites che fej ince pert dl patrimone natural mondial UNESCO.
I fins prinzipai é cualité de vita, sconanza dl ambiënt y evënc sostenibls tles Dolomites
Düc i contignüs dl memorandum of understanding dla mobilité fej referimënt a protocols universai por la sostenibilité y la sconanza dl ambiënt. Aladô dl Green Deel dessel gní sostigní mesi de mobilité söi jus che ne incuinëia nia por smendrí les emisciuns tl raiun dles Dolomites. N obietif é ince da mët sö punc de coliamënt danter la mobilité publica y privata. En general dessel gní smendrí la presënza de auti y motors söi jus y tles localités tles vijinanzes. “I obietifs prinzipai é da mioré la cualité de vita dles porsones söl post, da sconé la natöra straordinara dles Dolomites y da cherié formes de mobilité sostenibla por se möi te chësc raiun”, dij Alfreider.
Colaboraziun politica por mët en pe deboriada n management dla mobilité
Le Memorandum of Understanding por la mobilité é n signal politich important, deache aladô de Alfreider él nezesciar che düc fejes para pro n management dla mobilité söi jus y por coordiné les mosöres danter Venet, Trënt y Südtirol. Por arjunje chësc obietif él düc i partner che laorará por istalé na organisaziun suraregionala por cherié n plan plurianual dla mobilité y por evalué les mosöres y i dac dl trafich. Al gnará ejaminé nia ma la sort de veicui söi jus, mo ince la frecuënza y l’intensité. Por monitoré chëstes variables èl gnü istalé 12 staziuns de monitoring.
Mosöres sö de plü liví y te de plü vari
Tl procol él stabilí che i partezipanc mëtes en pratica mosöres asveltes ti agn 2021 y 2022 por na mobilité plü ativa, sciöche por ejëmpl da aumenté le numer de iadi dl trasport publich, da colié tres na cherta i mesi de trasport y da fá mosöres de sensibilisaziun y comunicaziun. Implü dessel ince gní lauré sön mosöres söles strades por i agn 2023 y 2024. Al é planifiché perts de strades nöies por les rodes y de plü plazes da parchené tles valades por lascé i auti. Implü vëgnel definí les poscibilités iuridiches y tecniches por regolamenté le trafich söi jus y da cherié na staziun unica de informaziun di dac söl trafich por avëi n management digital unitar. Chisc vari dess gní acompagná da domandes do n cofinanziamënt europeich de chëstes mosöres.
I partezipanc laorará fora ti proscims 60 dis n plan de mosöres por dui agn cun mosöres plü detaiades por i proscims sis mëisc. Le Memorandum of Understanding á na dorada de dui agn y pó gní arlungé.
san
