Azes nü ala Val Badia: ultima esplojiun por le tunel nü
Öna dles operes stradales plü granes dla provinzia á indô fat n vare inant: por l’azes nü ala Val Badia é incö domisde gnüda fata l’ultima esplojiun controlada por le tunel de segurëza.
Dui agn do le scomenciamënt ofizial di laurs él gnü a se le dé incö l'esplojiun finala por l'azes nü por la Val Badia. L'entrada nöia dess, aladô dl’assessur por la mobilité Daniel Alfreider, alisiré le trafich a San Laurënz y tla fraziun de Flaurënz, y garantí n coliamënt diret dla strada de Puster ala Val Badia. "L’infrastrotöra fej pert de n conzet general dla mobilité de Puster. I n’orun nia ma mioré le coliamënt dles ferates y di trus dales rodes, mo ince rové a n trafich plü sigü y regolar", dij Alfreider.
D’otober dl ann passé é gnü completé le tunel dl’entrada nöia, zirca n chilometer lunch. Sëgn é i laurs rová ciamó n toch inant. En mertesc domisde (13 d’aurí) é gnüda fata jí ciará l’ultima pert de crëp por le tunel de segurëza, lunch zirca 300 metri.
Trac fora 100.000 metri cubich de material – Düc i laurs tëgn ite i tëmps programá
Do che al é gnü adoré 60.000 chili de material esplosif y porté demez zirca 100.000 metri cubich de material, é sëgn les firmes tl laur da fá sö les fondamëntes dla strada y da realisé la pert interna de petun, de chëra che le 25 porcënt é bele gnü metü sö. Chisc laurs cun le petun messass gní stlüc jö da d’altonn. Dedô podaran scomencé cun i laurs stradai tl tunel y defora, y da mëte ite i implanc tecnics.
Ince i atri laurs sön le cantier, sciöche chi pro le punt, le rondel y le sotpassaje, che é düc tles mans dl grup de firmes incër STRABAG AG, Alpenbau, Moser & Co, Unionbau y Geobau, vá inant sciöche ai ê programá. Ala fin dl isté podará le trafich passé tl sotpassaje y an metará man cun i laurs de costruziun dla strada.
Aladô dl responsabl di laurs Umberto Simone, pëia ia l’azes nü ala Val Badia cun le tunel a Flaurënz dlungia l’incrujada por la zona produtiva Aue y se röia cun le coliamënt ala strada statala de Puster (SS49), 400 metri dan le tunel de Ciastel Badia, cun n rondel sura la strada de Puster. Cun n punt vëgn le rondel colié cun le tunel che röia tla Val Badia.
san/rc
