Da Pidro a La Val: ampliamënt dla strada y costruziun de n marciapisc
Incö ai 30 de aurí él gnü surandé i laurs da pert dl assessur Daniel Alfreider y dl ombolt Angel Miribung por l’ampliamënt dla strada y la costrziun de n marciapisc nü.
Aumenté la sigurté stradala y realisé n percurs plü sigü por chi che vá a pe é i obietifs prinzipai di laurs che é gnüs surandá incö vëndres ai 30 de aurí por ci che reverda le toch de strada danter Ciampló y Lunz tl Comun de La Val. La surandada ofiziala di laurs é gnüda a se le dé en presënza dl assessur por la mobilité y les infrastrotöres Daniel Alfreider, l’ombolt Angel Miribung, le aconsiadú provinzial Manfred Vallazza, le diretur dla Repartiziun Infrastrotöres Valentino Pagani y i responsabls dla Reparatiziun y dla dita interessada.
“Cun chësc intervënt orunse aumenté la sigurté por i peduns y por la zircolaziun di auti, dles corieres y di camions danter La Val y Pidro. Le fin é chël da ti garantí ales zitadines y ai zitadins na infrastrotöra stradala moderna por aumenté la cualité de vita ti paisc y por garantí che les families y i jogn stais a vire tles zones da munt”, spliga l’assessur Alfreider. L’ombolt Miribung á recordé l’importanza dl proiet por i abitanc dles döes fraziuns. "Chësc é n proiet che i un porté inant bele da de plü agn sciöche aministraziun comunala", á dit Miribung.
La Repartiziun Infrastrotöres á preodü la costruziun de n marciapisc nü y da slarié la strada por indöt un n chilometer de strada por garantí le passaje sigü danter auti y camions o corieres. Le marciapisc sará plü alt co la strada por aumenté la sigurté dles porsones che vá a pe. I laurs gnará fac dala dita PLONER S.r.l. da Bornech por na soma de 1,3 miliuns de euro.
File video y audio da desciarié
Video intervista Angel Miribung
Galaria dales fotografies
