20 agn Museum Ladin: daurides döes seziuns nöies
Le Museum Ladin festejëia i 20 agn dala daurida dl Museum cun la presentaziun de döes seziuns nöies, öna dedicada ala leteratöra ladina y l'atra ala scora tles valades ladines.
La storia dla scora tles valades ladines y la leteratöra ladina é les döes tematiches prinzipales dles seziuns nöies dl Museum Ladin Ciastel de Tor a San Martin. Inier, ai 24 de jügn él gnü daurí les seziuns nöies en ocajiun di 20 agn dala daurida dl Museum Ladin tl 2001. Ala festa dl aniversar ál tut pert danter l'ater l'assessur por la scora y cultura ladina Daniel Alfreider, le diretur dl Museum Stefan Planker, la direturia dl'Aziënda Museums dl Südtirol Angelika Fleckinger, le presidënt dl Consëi scientifich Heinrich Huber y la direturia dla Intendënza y Cultura ladina Edith Ploner.
Museum Ladin sciöche post de incuntades culturales
L'assessur Daniel Alfreider á sotligné por l'ocajiun che le Museum Ladin é sté dala daurida inant n punt de referimënt important por la cultura, la storia y la identité di ladins. “Le Museum Ladin cöi adöm, mantëgn y documentëia düc i bëgns materiai y imateriai che fej pert dla identité ladina. Le Museum é ince n post de incuntades danter les cultures, sciöche por ejëmpl tl 2016 tratan le torné dl palé por les mendranzes linguistiches Europeada”, á dit Alfreider.
Le presidënt Heinrich Huber á spo recordé te so discurs les tapes plü importantes dl Museum Ladin dan la fondaziun y cina aldedaincö. “N contribut important por la fondaziun dl Musuem é sté chël dl presidënt da denant dl Ert por i Ladins EPL Angel Morlang y dl ombolt da denant Pepi Dejaco. Dala daurida él le Museum che á dé fora 40 publicaziuns. Al é gnü organisé söporjö 250 manifestaziuns, sis ediziuns dla Trienala Ladina y 60 mostres”, á dit Huber.
10 agn de Museum Ladin Ursus Ladinicus
Tl 2011 él spo gnü inaudé le Museum Ladin Ursus Ladinicus a San Ciascian che trata dla laurs preistorica y dla geologia dles Dolomites. Dal 2012 él le Museum che á ince n depot cun na racoiüda dër ampla de ogec desvalis. Tl 2003 él ince gnü realisé n garage, olá lascé i auti di vijitadus.
Le diretur Stefan Planker, che lascia la inciaria cun la fin de jügn, á orü rengrazié düc i colaboradus y les colaboradësses por la buna colaboraziun dal 2002 inant. La direturia dl'Aziënda Museums dl Südtirol, Angelika Fleckinger surantol la direziun ad interim cina che al gnará curí l'inciaria.
Döes seziuns nöies
Öna na seziun reverda la storia dla scora tles valades ladines. Al vëgn presenté les tapes plü importantes dl sistem scolastich tles valades ladines dai tëmps dl Imper austroungarich passan por i tëmps dles döes veres mondiales cina ala introduziun dl sistem paritetich. La seziun é gnüda presentada dal Intendënt da denant Roland Verra.
La secunda seziun reverda la leteratöra ladina. Al vëgn presenté les biografies de auturs ladins y auturies ladines. Al é ince poscibl da aldí na pert de sües operes te na postaziun multimediala. I tesć é dla scrituria Rut Bernardi.
Infos: www.museumladin.it
rc/san
Galaria dales fotografies
