Scora ladina: Rai Yoyo fej na seria da d’isté tla Val Badia y Gherdëna
Descorí la natöra y la fauna dles Dolomites y la storia y cultura ladina: Rai Ragazzi á realisé en colaboraziun cun l'Intendënza na seria de trasmisciuns por mitans y mituns tles valades ladines.
Esperiënzes interessantes che conscidrëia i trëi lingac dla Provinzia y cunta le monn dla natöra dles Dolomites y dla cultura ladina dles valades de Gherdëna y Badia: chisc é i fins prinzipai dla seria da d’isté nöia de Rai Yoyo dal titul “Diario delle vacanze in montagna”. Al se trata de na trasmisciun por mitans y mituns y che contëgn informaziuns y coriosités dla cultura ladina, dla natöra dles Dolomites, dles ativités alaleria por döta la familia. La trasmisciun é gnüda realisada da Rai Ragazzi en colaboraziun cun l’Intendënza y Cultura ladina y l’Ofize Relaziuns publiches dla Provinzia.
Le program vëgn coordiné dal regist Armando Traverso y é ponsé sciöche acompagnamënt por les mitans, i mituns y les families te chësc tëmp de pandemia por presenté tematiches interessantes che reverda la natöra, la geologia, le monn di tiers, la cultura y les ativités alaleria y sportives. Tratan les trasmisciuns sarál les mitans y i mituns che jará a descorí de plü ativités interessantes che an pó fá tla Val Badia y te Gherdëna tres acompagná da esperc y espertes dl setur. Les mitans y i mituns jará danter l’ater a vijité museums, a fá arpizades, a descorí le monn di tiers salvari y dla geologia y natöra dles Dolomites. “Cun chësta seria de trasmisciuns orunsé presenté tematiches desvalies te na manira scëmpla y plajora por döta la familia. Tl zënter él l’importanza da sté adöm y fá cosses deboriada en familia. Ti filmac dles valades ladines un ince sotrissé la gran valüta che le plurilinguism á te chësc contest”, dij Traverso.
Avëi la poscibilité da presenté le valur implü dl plurilinguism é n messaje de gran importanza y richëza por l’assessur por la scora y cultura ladina Daniel Alfreider y por l’Intendënta ladina Edith Ploner. “Insciö podunse mostré da öna na pert la belëza de nostes munts dles Dolomites y dal’atra pert la promoziun dl plurilinguism de nosc sistem scolastich”, dij Alfreider.
La trasmisciun é gnüda realiasada respetan les normes de sigurté. Indöt él gnü fat 12 trasmisciuns danter l’ater tl Museum Ladin “Ciastel de Tor” y “Ursus ladinicus”, sön i prá de Armentara, sön la ferata de Gardenacia, tla Ciasa dl Parch natural “Fanes-Senes-Braies” a Al Plan, sön Monte Pana, a Bula, Urtijëi y a Sacun te Gherdëna.
Les trasmisciuns dales valades ladines sará da odëi da en lönesc ai 19 de lugio tres dales 18:30 inant sön Rai Yoyo. Dedo sará i video da odëi sön la plataforma digitala de RaiPlay. Por les trasmisciuns da Gherdëna él gnü a se le dé ince na colaboraziun cun les organisaziuns turistiches de Gherdëna. Dal 12 de lugio inant sarál da odëi por n’edema les trasmisciuns realisades tl Trentin.
rc
Galaria dales fotografies
