"Nummi”: na publicazion dl Ciamp pedagogich dla Ntendënza ladina
N merdi, ai 24 de agost, iel unì prejentà l cufer didatich “Nummi: numeri da 0 a 10” sciche nce l cudejel de eserzizies te na videocunferënza ala nseniantes y ai nsenianc dla scoles primeres ladines.
Nummi, l arani, acumpaniëia la sculees y i sculeies a mparé i numeri da 1 a 10. Chedri da parëi cun numeri, ciampes de dejines, listes cun risses, chedri de dei, ciafites y biesces dëssa sauridé a mparé i numeri y a recunëscer cuantiteies. Cun grafiches scemples y culëures deferënc per deferenzië numeri pèr y desc, vëniel metù la fundamënta per l nseniamënt de conc tla scoles primeres.
Dlongia i chedri da parëi iel unì laurà ora n cudejel de eserzizies per sculees y sculeies, ulache cun truep eserzizies desvalives, scëmpli y nce plu cumplichei vëniel dat inant te na maniera jughënta i numeri da 0 a 10 y si culegamënt cun eserzizies de conc. Pra i eserzizies se nuzen dla ilustrazions di chedri da parëi per jì plu sot tla cunescënza di numeri. I eserzizies ie graficamënter fac a na maniera che i sculeies possa se lauré ite ti singuli numeri autonomamënter. Spligazions scemples di eserzizies ie repurtedes tl cudejel per ladin, tudësch, talian y nglëisc. L cudejel de eserzizies ie dan man tl idiom ladin de Gherdëina y nce tl idiom ladin dla Val Badia. “L valor sëuraprò de chësc cufer ie propi l’adurvanza di trëi lingac nce tl ciamp dla matematica y la bela prejentazion grafica y vijuela per mparé i conc nchina 10” nsci la Ntendënta Edith Ploner.
Oradechël vën l cudejel de lëur nce metù a despusizion online per pité na autra maniera de adurvé l material didatich. Pra la verscion-online possen tres mouse-click crì ora pra la istruzions de lëur una dla cater rujenedes. Chësc sauridea l nseniamënt plurilinguistich tla valedes ladines, ulache la rujeneda de nseniamënt tla singuala materies muda periodicamënter.
La drëta soluzions dl cudejel de eserzizies possa unides cunsultedes online per cuntrol da nseniantes y nsenianc.
“Nummi” ie nasciù dala culaburazion danter l Ciamp pedagogich dla Ntendënza y Cultura ladina y nseniantes dla prima tlasses dla scola primera che ova l dejidere de amplië l mparé i numeri tres chedri da parëi. Cunzet, idea y coordinazion dl proiet ie de Ute Senoner, la grafica ie de Anita Demetz. I tesc ie unic ciancei y letorei tl ufize Cuestions linguistiches dla Provinzia autonoma de Bulsan y da Alessandra Zardo y David Chapman.
L cufer didatich vën dat a duta la 1a tlasses dla scoles primeres dla Val Badia y de Gherdëina, l cudejel de eserzizies metù a despusizion a duta la sculees y duc i sculeies dla prima tlasses.
Sëuraprò à l Ciamp pedagogich laurà ora n glosser cun esprescions tl ciamp dla matematica tla rujenedes ladin, talian, tudësch y nglëisc. La nseniantes y i nsenianc possa l cunsulté y a chësta maniera judé pea a adurvé la drëta esprescions tl nseniamënt plurilinguel.
Pra la prejentazion dl material didatich fovel prejënc la Diretëura dla Ntendënza y Cultura ladina Edith Ploner y l Diretëur dl Ciamp pedagogich Felix Ploner.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red
