Le Minority SafePack dess gní traté tl Comité europeich dles Regiuns
La Junta provinziala á traté la tematica dles mendranzes y dla scomenciadia dl Minority Safepack y á inciarié le presidënt Kompatscher da inserí la tematica tl’ajënda dl Comité europeich dles Regiuns.
La tematica dla sconanza dles medranzes linguistiches y dla scomenciadia dl Minority SafePack é gnüdes tratades tratan la sentada dla Junta provinziala l’edema da denant. Al é gnü baié dla denunzia (Chestiun iuridica T-158/21) dan la Curt de iustizia europeica ai 24 de merz dl 2021 portada dant dal Comité di zitadins y che reverda la refodada da pert dla Comisciun europeica de adoté mosöres contignüdes tl Minority Safepack, sciöche ince damané dal Parlamënt europeich tl dezëmber dl 2020. La Junta á sotligné so sostëgn por l’aziun dl COmité di zitadins y á damané al presidënt dla Provinzia Arno Kompatscher da porté dant la tematica di dërc dles mendranzes linguistiches ince tl Comité europeich dles Regiuns.
Le Minority Safepack é na scomenciadia de zitadines europeics che á coiü adöm n miliun de firmes de sostëgn da döta l’Europa. L’obietif prinzipal dla scomenciadia é chël da istituí a livel europeich standarg por le sostëgn dles mendranzes autoctones linguistiches di Paisc mëmbri por sconé y svilupé inant la pluralité culturala y linguistica te Europa.
“La scomenciadia Minority Safepack á n sostëgn politich sterch te döta l’Europa y vëgn sostignida da de plü Parlamënc nazionai y regionai. Porchël mëss les tematiches proponüdes gní tratades” á dit le presidënt dla Provinzia Arno Kompatscher.
“La dezijiun dla Comisciun europeica ne é nia da capí, dandadöt sce an pënsa che l’Uniun Europeica á sotligné süa responsabilité por le mantignimënt dl patrimone cultrual y linguistich te Europa”, á sotligné le vizepresidënt ladin dla Provinzia Daniel Alfreider.
Ince le Consëi provinzial dl Südtirol á damané cun na moziun (Nr. 399/21) che l’Uniun Europeica sciöche istituziun de garanzia dla sconanza dles mendranzes se fistidiëies de chësta chestiun ince a livel europeich.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red/san/sa
