Consëi scolastich: Buratti, Senoner y Nocentini ala presidënza
Inier ai 26 d’otober él sté la pröma sentada dl Consëi scolastich provinzial nü, a chëra che al á ince tut pert i assessurs Alfreider, Achammer y Vettorato. Christoph Buratti é le presidënt nü.
La scora ti ciara cun crëta al dagní do dui agn de dificoltés y de desfides gaujades dala pandemia Covid-19. Inier ai 26 d’otober él insciö gnü a se le dé la pröma incuntada ofiziala dl Consëi scolastich provinzial nü tl Istitut Tecnich Economich “Heinrich Kunter” a Balsan. Les partezipanets y i partezipanc é gnüs nominá dan da püch dala Junta provinziala por i proscims cater agn cina al ann de scora 2024/25. Tratan la sentada él gnü lité le presidënt y i vizepresidënc che rapresentëia düc trëi i grups de lingaz. Al se trata de Ivan Senoner por la scora ladina, Christoph Buratti por la scora todëscia y de Chiara Nocentini por la scora taliana. Buratti surantol la inciaria de presidënt che passa spo a Nocentini y che ti gnará surandada por l’ultima pert dla dorada dl Consëi atuala a Senoner.
Le Consëi scolastich provinzial é l’organ de rapresentanza dl monn dla scora cun 61 partezipantes y partezipanc te düc trëi i grups de lingaz. Al dij la süa sön domandes importantes che reverda i ciamps dla formaziun y dá jö n arat sön i dessëgns de lege sön la scora y la formaziun.Al fej ince pert dl Consëi scolastich provinzial i assessurs por la scora y cultura Daniel Alfreider, Philipp Achammer y Giuliano Vettorato. Sües competënzes, süa composiziun, süa strotöra y so regolamënt vëgn regolamentá dala lege provinziala di 12 de dezëmber dl 1996, n. 24.
Por l’assessur ladin Alfreider s’á le monn dla scora mudé cotan dal 2019 inant y por chësta gaujia él important da aldí y valuté les propostes y les valutaziuns de döt le monn dla scora rapresenté tl Consëi scolastich provinzial. “Implü á le Consëi ince n rode important de dialogh danter i trëi grups linguistics y de fujina de idees por les trëi Intendënzes scolastiches.”
“Le rode dl Consëi scolastich é de gran importanza – á sotligné l’assessur Achammer – y chësc vëgn ince confermé dal fat che la Junta á rezepí les indicaziuns dl Consëi da denant y che i oress rengrazié por le gran laur fat. I sun sigü che la colaboraziun pois ince funzioné tan bun ti proscims cater agn por le bëgn dla scora, de nostes mitans y mituns y por döta la jonëza.”
“Le monn dla scora á messü afronté na seria de desfides liades ala pandemia”, á recordé l’assessur Vettorato. Impó él sté meso, aladô dl arat de Vettorato, da lauré inant cun determinaziun y cun impëgn da pert de scolars, insegnanc y suranstanc scolastics. “Por le dagní él tröpes desfides che nes aspeta: da promöie les relaziuns soziales, da ti dé valur al aprendimënt y da recuperé les mancianzes dles architades gnüdes a se le dé ti ultims dui agn”.
Clican chiló röiun ala verjiun originala dl comunicat stampa por visualisé imajes, documënc o video che taca lapró
tl
