Jüc Olimpics 2026: Costituziun dla sozieté de infrastrotöres
A Roma él gnü costituí inier la sozieté “Infrastrutture Milano Cortina 2020 – 2026 SpA”. Por le Südtirol él sté le vizepresidënt Daniel Alfreider che á firmé l’at de costituziun.
Por s’arjigné ca te na manira strategia ai Jüc Olimpics y Paraolimpics da d’invern dl 2026 él gnü fat inier ai 22 de novëmber a Roma n vare important. Tl Ministere por les Infrastrotöres y la Mobilité sostenibla él gnü costituí la sozieté por aziuns “Infrastrutture Milano Cortina 2026”. Chësta sozieté sará responsabla dla realisaziun dles operes publiches por i Jüc Olimpics dl 2026 de Milan y Ampëz. L’at de costituziun dla sozieté é gnü firmé ala presënza dl minister dles Infrastrotöres y dla Mobilité Enrico Giovannini, dl rapresentant dl Ministere por l’Economia y les Finanzes, Filippo Giansante, dl vizepresidënt dla Provinzia de Balsan Daniel Alfreider en rapresentanza dl presidënt Arno Kompatscher, dl presidënt dla Regiun Lombardia Attilio Fontana, dl presidënt dla Regiun Venet Luca Zaia y dl presidënt dla Provinzia de Trënt Maurizio Fugatti.
Dan la firma él gnü a se le dé n incuntada dl grup de direziun a chël che al á tut pert le vizeminister Alessandro Morelli, la secreteria de Stat al Ministere por le Sport Valentina Vezzali, le presidënt dl CONI, Giovanni Malagò, le presidënt dl comité paraolimpich Luca Pancalli, l'ombolt de Milan Giuseppe Sala y chël de Ampëz Gianpietro Ghedina. La Provinzia de Balsan á aprové la costituziun dla sozieté por aziuns ai 19 de otober y á insciö dé so bëgnester por la sotescirziun dl contrat de costituziun.
La sozieté sará n partner fondamental por l’atuaziun di programs de costruziun
L’assessur por la mobilité Daniel Alfreider á sotligné che “cun la firma da incö unse cherié na basa importanta por la realisaziun di proiec de costruziun tl contest di Jüc Olimpics y Paraolimpics dl 2026. Al gnará realisé proiec nia ma por la manifestaziun sportiva, mo ai é ponsá dantadöt por porté vantaji ala popolaziun locala por i proscims dezenns y ales generaziuns che vëgn docá.” Por ejëmpl vëgnel finanzié tl Südtirol la costruziun de infrastrotöres sciöche la varianta dla Val de Riga por potenzié la mobilité sön scines y d’atri proiec por na mobilité sostenibla y sigüda.
Sozieté nöia: les cuotes dla Provinzia de Basan é dl 5 porcënt
La Provinzia de Balsan á na cuota dl 5 porcënt dla sozieté nöia y á insciö paié ite indöt 50.000 euro al capital sozial. Le 35 porcëgnt vëgn metü a desposiziun dai Ministeri por l’Economia y les Infrastrotöres. 10 porcënt porom dles cuotes é dles döes Regiuns Lombardia y Venet y le 5 porcënt che mancia é dl Trentin.
Clican chiló röiun ala verjiun originala dl comunicat stampa por visualisé imajes, documënc o video che taca lapró
jw/ic
