Sentedes dla Consulta culturela ladina tl 2022
La Consulta culturela per la grupa de rujeneda ladina se à ancuntà doi iedesc chëst ann per traté truepa dumandes de cuntribut per la cultura ladina.
La Consulta culturela per la grupa de rujeneda ladina se anconta n valgun iedesc al ann per traté la dumandes de cuntribut tl ciamp dla cultura per l’atività y i nvestimënc dla lies ladines ma nce per cuntribuc a artisc y artistes. La Consulta ie nce n organ consultif per la ndividuazion dla vijions de politica culturela. La ie metuda adum dal assessëur Daniel Alfreider che ie l presidënt, Christa Kasslatter, Lara Moroder, Konrad Tavella y Ludwig Rindler.
Pra la prima doi ancuntedes de chëst ann 2022 iel unì tratà ades 60 dumandes de sustëni economich ai artisc y ala artistes, a lies y ënc, sibe per proiec y ativiteies cultureles che per cumpré trohtes y strumënc. L giaperà n cuntribut bën 11 artisc y artistes, 36 lies per si proiec y ativiteies cultureles y 5 lies per cumpré trohtes y strumënc. De ndut iel unì cunzedù cuntribuc per ca. 308.000,00 euro.
Per l presidënt dla Consulta y assessëur per la cultura ladina Alfreider ie l lëur dla Consulta culturela de gran mpurtanza per ti dé n sustëni cuncret ai artisc, ala artistes y ala lies per proiec y ativiteies cultureles de gran valor per la cumenanza ladina. "Messon vester cuntënc dla particularità che on te nosta valedes ladines, dl liam sterch danter tradizions y nosta rujeneda dl’oma, savon che l ie n valor mplu che messon cialé da sustenì inant nce tres l’ert, la leteratura y la cultura ladina", dij Alfreider che tol l’ucajion per rengrazië nce i mëmbri dla consulta per l lëur fat te chisc mënsc.
Tl ciamp dla cultura vëniel ora de chësc mo cunzedù cuntribuc per publicazions y ativiteies de furmazion. Chësta dumandes vën tratedes da esperc y espertes tla cumiscion per l sustëni de publicazions y tla cumiscion per l sustëni de ativiteies de furmazion.
Clican chiló röiun ala verjiun originala dl comunicat stampa por visualisé imajes, documënc o video che taca lapró
nst
