Scores ladines: l’ejam de maturité mët man incö
Por rodunt 73 jogn y jones dles scores altes ladines de entrames les valades mët man incö, mercui ai 22 de jügn, l’ejam de maturité dl ann scolastich 2021/22.
Por rodunt 73 jogn y jones dles scores altes ladines de entrames les valades mët man incö, mercui ai 22 de jügn, l’ejam de maturité dl ann scolastich 2021/22. Bele ti ultims dis de scora á i Consëis de classa dles singoles direziuns tut la dezijiun en cunt dl’amisciun dles studëntes y di studënc al ejam de Stat.
Deperpo che ti ultims dui agn é l’ejam de maturité dla scora alta a gauja dla pandemia gnü realisé ma tres na proa a usc, vëiga l’ejam de Stat a conclujiun dl ann de scora 2021/2022 ince indô dant na pert scrita. Insciö á le Minister dl’Istruziun statal arjunt che la strotöra dl ejam ti somëies deplü ala forma “regolara” dl ejam che é definida dal Decret legislatif n. 62/2017.Na picia novité por l’ejam 2021/22 tles scores de Südtirol é chëra che al sará en chësc ann ma döes proes scrites impede trëi.
Döes proes scrites, n ejam a usc
Tles scores altes ladines podará vigni studënta instëssa y vigni studënt instës stabilí le lingaz (talian o todësch) da adoré por la pröma proa scrita, che se damana da scrí n test sön na tematica da chirí fora danter deplü argomënc. La secunda proa scrita se dá spo dedô jö cun na materia che caraterisëia la tipologia de scora alta frecuentada.
Deperpo che i temesc por la proa scrita de talian o todësch vëgn dá dant a livel zentral, vëgn les proes tla materia che caraterisëia la tipologia de scora alta laurades fora dales comisciuns d’ejam instësses. Insciö dessel gní tigní cunt dles condiziuns desvalies dl imparé tratan la pandemia y dl percurs formatif de vigni singola classa.
Degöna terza proa scrita
Por l’ann de scora 2021/22 ne él gnü odü dant degöna proa scrita tl lingaz che la studënta/le studënt ne á nia adoré tla pröma proa. Les competënzes te chësc lingaz gnará ejaminades y valutades tratan la proa a usc, che tol ite dötes les materies.
Tl cheder dl ejam a usc gnarál danter l’ater traté temesc che toca pro le ciamp de aprendimënt interdisciplinar Educaziun zivica. Tratan la proa podará les studëntes y i studënc ince porté dant les esperiënzes che ares/ai á fat tratan les edemes de practicum te aziëndes y istituziuns desvalies.
Les comisciuns di ejams de Stat dles scores altes sará metüdes adöm, sciöche ti ultims dui agn, da sis insegnantes/insegnanc dla classa y da na presidënta che vëgn da n’atra istituziun scolastica.
Scora mesana: Ejam final scrit y a usc
Passa 230 scolares y scolars á frecuenté en chësc ann la terza classa dles scores mesanes ladines. L’ejam final dles scores mesanes á bele metü man ai 17 de jügn y é metü adöm da trëi proes scrites (talian, todësch, cunc) y da na proa a usc che á n carater interdisciplinar. Tl cheder dla proa a usc vëgnel ince valuté les competënzes linguistiches che les scolares y i scolars á arjunt ti lingac ladin y inglesc; lapró messará les scolares y i scolars desmostré da avëi arjunt i obietifs formatifs dl ciamp de aprendimënt interdisciplinar “Educaziun zivica”.
Sides tla scora mesana co tla scora alta podará les proes scrites ma gní realisades en presënza. Por ci co reverda l’ejam a usc, él te caji particolars ince la poscibilité da dé jö l’ejam tres videoconferënza.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red
