Kompatscher anconta Braitenberg, l coordinadëur nuef de Rai Südtirol
Pra l’ancunteda danter l presidënt dla Provinzia Arno Kompatscher y l coordinadëur nuef de Rai Südtirol Zeno Braitenberg iela jita dla cunvenzion cun la Rai y dla programazion de Rai Südtirol.
Dai 18 de auril ie Zeno Braitenberg l coordinadëur nuef de Rai Südtirol. L jurnalist y muderadëur dla televijion de 57 ani ie unì metù su dala sënta zentrela dla Rai de Roma, a una cun la Provinzia de Bulsan, per mené Rai Südtirol do Markus Perwanger, che ie jit n pension. Ai 23 de juni à Braitenberg ancuntà l presidënt dla Provinzia Arno Kompatscher.
Braitenberg à spiegà al presidënt de se avëi nuzà dl tëmp nchin sën, do avëi mudà dala redazion al coordinamënt, per se dé ju plu avisa cun i ciamps desvalifs de Rai Südtirol y cun si funziunamënt per pudëi pona nvië via inuvazions al var cun i tëmps.
“Te si funzion da stazion-radio y televijion publica de rujeneda tudëscia ie Rai Südtirol de gran mpurtanza te Südtirol per la mendranzes de rujeneda tudëscia y ladina“, à auzà ora Kompatscher. L presidënt dla Provinzia à pona lecurdà l fin de realisé na programazion che à da nfé cun l Südtirol, che Rai Südtirol “meterà a jì cun na gestion nueva te na forma nueva“.
Ntan l’ancunteda se à sibe l presidënt dla Provinzia sibe l coordinadëur nuef mbincià de pudëi slargë ora mo de plu l’autonomia dla Rai dl post.
La storia de Rai Sender Bozen (dal 2014 inant Rai Südtirol) scumëncia ufizialmënter sun la basa dl’Acurdanza Degasperi-Gruber dl 1946. La Rai trasmetova bele tl 1945 programs per tudësch. Ala fin dl 2012 à la Provinzia sëurantëut l finanziamënt ntier di programs Rai per tudësch y per ladin cun la Cunvenzion Rai. L ie unì fissà 5.300 ëura de trasmiscion radio per tudësch y 760 ëura de programs tla televijion per tudësch al ann. Zeno Braitenberg ie l cuarto coordinadëur Rai do Franz von Walther, Rudi Gamper y Markus Perwanger.
Clican chiló röiun ala verjiun originala dl comunicat stampa por visualisé imajes, documënc o video che taca lapró
jw/ns
