Reghister provinziel dl’artistes y di artisć: apruvei i criters
La Jonta provinziela à apruvà i criters per n reghister provinziel dl’artistes y di artisć y à nsci fat n var mpurtant de viers de n cuntribut per la pension per chi che lëura tl ciamp dl’ert.
Davia che la categoria prufesciunela dl’artistes y di artisc freelance ne ie nia scuneda assé per cie che reverda la pension, iel de bujën de n cuntribut de previdënza cumplementer per artistes y artisc tl Südtirol. La cundizion per pudëi dé chësc cuntribut ie avëi n reghister provinziel de duc i artisc y duta l’artistes dl Südtirol. Tl reghister saral laite duc chëi y duta chëles che toca pra la categoria prufesciunela dl’artistes y di artisc. Ntan si senteda da ncuei (30 de agost) à la Jonta provinziela dat pro i criters per la gestion y l funziunamënt de chësc reghister provinziel. La Provinzia uel ti judé al’artistes y ai artisc freelance scric ite tl reghister provinziel cun n cuntribut de previdënza cumplementera de 500 Euro al ann.
L reghister provinziel sciche “var mpurtant“ per la pension
“Chësc ie n var mpurtant de viers de na segurëza soziela per artisc y artistes do na cërta età“, auza ora l assessëur per la cultura tudëscia. Sun si scumenciadiva iel unii laurei ora i criters per l reghister provinziel deberieda cun la trëi repartizions ala cultura. I trëi assessëures per la cultura ie a una che la vianvieda dl reghister provinziel ne ie nia mé l prim var per miuré la situazion dla pension de chësta categoria prufesciunela, ma nce na mesura de sustëni sustenibla y unica te dut l raion nazionel.
L reghister provinziel nuef vën aministrà dala repartizion ala cultura tudëscia y taliana y dala repartizion per la scola y cultura ladina sciche “sëul reghister per duc“. Nsci iel mesun tò ite duta l’artistes y duc i artisc freelance che sta te Südtirol y che uel ativé na pension ntegrativa. A chësc fin vëija l reghister dant cin categories: artisc y artistes dal ciamp dl’ert performativa, dl’ert visiva, dla mujiga, dla leteratura y dl chino.
Recuisic per se scrì ite tl reghister provinziel
Per unì tëuc su tl reghister provinziel muessa l’artistes y i artisc freelance fé dumanda. I criters vëija dant doi cundizions fundamenteles per pudëi unì purtei ite tl reghister: l artist o l’artista che fej dumanda muessa abité te Südtirol y muessa avëi laurà prufesciunalmënter tl ciamp dl’ert per almanco doi ani dan fé dumanda y nce vester bon de l desmustré.
La dumandes per unì purtei ite tl reghister provinziel possa unì mandedes al Ufize Cultura de referimënt nchin ai 31 de mei de uni ann tres n formuler aposta deberieda cun l curriculum y duta la documentazion che desmostra la prufesciunalità dla persona. Duta la dumandes vën ejaminedes da na cumiscion de valutazion. Mé chëst’ann possa artistes y artisc freelance mandé la dumanda per se scrì ite tl reghister provinziel 2022 nchin ai 26 de setëmber. L reghister va n forza cun la publicazion tla Plata Ufiziela dla Region.
Clican chiló röiun ala verjiun originala dl comunicat stampa por visualisé imajes, documënc o video che taca lapró
eb/nst
