Dis pedagogics per l personal nseniant dla scoles y scolines ladines
Cun ncuei se stluj ju i Dis pedagogics metui a jì dala Ntendënza ladina per duta la nseniantes y i nsenianc dla scoles y l’educadëures dla scolines ladines.
La valutazion y l feedback sciche tematiches prinzipeles di Dis pedagogics, na furmazion de ublianza per nseniantes y nsenianc dla scoles autes, mesanes y elementeres ladines y per l’educadëures dla scolines ladines. I Dis pedagogics se à tenì dai 26 ai 30 de setëmber y ie unii urganisei dal Ciamp pedagogich dla Ntendënza ladina sibe te Gherdëina che tla Val Badia cun l fin de capì plu avisa co sustenì l mparé che resta tla memoria per giut.
L personal nseniant à tëut pert n di ntier a chisc cursc de furmazion, partii su aldò dl livel scolastich, cun i referënc y la referëntes Markus Luterbacher, Alessandro Lanza, Tatjana Albert y Andrea Forleo de Schulentwicklung.ch dla Svizra. Duta la partezipantes y i partezipanc à pudù mparé y purvé ora danter l auter co purté ite l feedback ntan la lezion y pensé do sun tan na gran nflus che la maniera de pensé à sun l mparé. Nce la gran mpurtanza dl muvimënt per l mparé ie unida sotrisseda plu iedesc. Duta la scolines y scoles ladines à azes al portal IQESonline ulache l ie da abiné truepa ideies y material didatich.
Aldò dla Ntendënta Edith Ploner ie “i Dis pedagogics che vën urganisei uni ann na bona ucajion per purté ite ideies nueves te nosta scoles y scolines per sté for al var cun i tëmps ti pitan al personal nseniant n curs de furmazion de cualità“.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red
