Presenté le liber "1892-2022: 130 agn Strada dla Val Badia"
L’edema da denant, a San Martin, él gnü presenté le liber che cunta la storia dla strada dla Val Badia, scrit en gaujiun di 130 agn de costruziun dla infrastrotöra che condüj da San Laurënz a Corvara
Le liber, scrit da Werner Pescosta documentëia i gragn laurs por l’entrada nöia te Val Badia, y pita na gran compëda de testemonianzes d’archif, dandadöt de fotografies, y ti vá do cronologicamënter ai fac che á porté pro ala funzionalité dla strada d’aldedaincö.
L’autur á mostré sö i contenüs dla publicaziun y spo an podü aldì i intervënc di injiniers Umberto Simone, diretur dla Repartiziun Infrastrotöres dla Provinzia, y Andrea Marzi, diretur tecnich dla Strabag, l’impreja che á realisé le tunel y le punt de San Laurënz. Trami á dit fora süa sodesfaziun por chësta ultima opera, realisada te n tëmp plütosc cört y signé dales dificoltés portades sides da Vaia y co dala pandemia.
L’assessur da denant, Florian Mussner, che ê en ciaria canchr al ê gnü invié ia le proiet dl tunel de San laurënz, y che s’à dé jö por la realisaziun di atri 5 tunì y de deplü intervënc söla strada dla Val Badia, à sotrissé che la strada rapresentëia n coliamënt fondamental danter la jënt dla Val Badia y i atri raiuns dla Provinzia, y che ara à porté pro a n gran svilup sozial y economich.
“Chësta infrastrotöra à dagnëra albü n’importanza daspavënt grana, por les comunicaziuns y por l’economia de düt nosc raiun: ti ultimi 130 agn sunse passá dal’isolamënt pëigher y chit di secui da denant, al gran noto y al bëgnester de nüsc dis", à sotrissé l’assessur Daniel Alfreider.
Le liber mostra i spostamënc de percurs, la costruziun de punc, l’injunta de tuní, mo ince le logoramënt y les stratificaziuns dl funz che é gnüdes a se dé tl tëmp, y ti vá do a düc i cambiamënc dla strada, a so renovamënt che à signé y sëgna dötaorela la vita dles porsones y dla valada intiera.
Le liber nü "1892-2022: 130 agn Strada dla Val Badia", dé fora dal Istitut Ladin Micurà de Rü pó gnì compré te Istitut. Na copia ti gnarà scincada a vigni comun y ales biblioteches.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red/san
