Cunliamënt eletrich Laion-Corvara: scumenciamënt di lëures ai23 de mei
Garantì la segurëza dl refurnimënt zënza danejé la cuntreda: chësc ie l obietif dla linia de cabl sot a tiera da 132 kilovolt danter Laion y Corvara. I lëures scumëncia ncuei.
L gestëur dla rë a tenscion auta Terna ie tl lëur de realisé n cunliamënt eletrich nuef danter i chemuns de Corvara tla Val Badia y Laion, tla ntreda de Gherdëina. La linia nueva a tenscion auta ie longia 23 chilometri, la passa tres i chemuns de Laion, Ciastel, Urtijëi, Santa Cristina, Sëlva y Corvara y sarà defin sot a tiera.
"La linia nueava di cabli sot a tiera garantirà l refurnimënt de energia eletrica ti luesc de sport da d’inviern tl raion dl Jëuf de Frea y dl'Alta Badia y renfurzerà la resilienza dla rë eletrica te n raion che ie ti ultimi ani suvënz stat tucà da ntraunides meteorologiches estremes", à sotrissà l presidënt dla Provinzia Arno Kompatscher ntan la cunferënza stampa da inier (22 de mei) tl Palaz provinziel 1 de Bulsan. L proiet toma tl plan de nvestimënc de Terna per la reurganisazion dla rë a tenscion auta te nosta provinzia.
Fazion bassa sun la cuntreda
Coche Enrico Maria Carlini, respunsabl dla planificazion dl sistem eletrich y autorisazions de Terna, à spligà, arà l cabl che unirà metù defin sot a tiera, mé na pitla fazion sun la cuntreda y per gran pert de si trassa ti jiral do ala streda prinzipela (SS242 e SS243). “Cun l nvië via di cantieres – à dit Carlini – pions via cun la fasa de realisazion dl cunliamënt cun cabl nuef danter Laion y Corvara. I lëures de cantier durerà de ndut 30 mënsc cun l travert de finé y mëter n droa l’opra tl 2025. L’infrastrutura, per chëla che Terna fajerà n nvestimënt de plu de 40 milions de euro, ie na fundamënta per l’afidabltà dla rë eletrica dl Südtirol y chël nia mé n cunscidrazion dla manifestazion olimpica Milano Cortina 2026. Si realisazion, defati, juderà, cun d’autri ntervënc mpurtanc preudui da nosta sozietà, à avané la resilienza dla rë eletrica tl Südtirol”.
“La tematica dla segurëza y dla resilienza dla rë de destribuzion dl’energia eletrica giapa sën la medema mpurtanza dla produzion y di cosc dl’energia eletrica” à cumentà l assessëur provinziel per l’Energia, Giuliano Vettorato. “Te chisc ani cun Terna ons laurà deberieda a na maniera strënta y i lëures, che scumëncia duman, sun la trassa Laion-Corvara per mëter sot a tiera i cabli ie l prim frut cuncret de chësc proiet. Nsci garantiran stabiltà y segurëza ai chemuns dassënn turistics, te Gherdëina y tla Val Badia, y a duta la mprejes y firmes locales. Nce l reurdinamënt dla rë tla Val d’Isarch va te chësta direzion. Perchël, donca, nosc mpëni cuncret per garantì vantajes ambientei, de cuntreda y de cuntinuità tl refurnimënt eletrich”. La reuganisazion dla rë a tenscion auta tla Val d’Isarch y i cunliamënc eletrics Vintl-Burnech y Toblach-Sest ie d’autri proiec mpurtanc. "Duc i proiec à n cumenanza l suzes de avëi tëut ite i chemuns y i zitadins te n pruzes de partezipazion globala", à njuntà l assessëur provinziel.
Ncuei, merdi, ai 23 de mei, scumenciamënt di lëures
Te chësta prima fasa, te chëla che n se cruzierà dla realisazion di lëures zevii che ie de bujën per mëter po ju i cabli, uniral laurà tl medmo tëmp sun doi cantieres che nteresserà i chemuns de Laion y Sëlva te Gherdëina: l prim cantier ie sun la trassa danter Puntives y Urtijëi, l segondo sun la trassa dla streda statela SS243 che dal raion de Piz Culac mëina sun Jëuf de Frea. Duta l’ativiteies unirà dejëutes da Terna n coordinazion y sinergia cun la Provinzia de Bulsan, l’aministrazions locales y i ënc nteressei per limité al plu la fazions negatives di lëures sun l trafich. Sun i cantieres uniral laurà ntan l di dal lunesc ala sada da duman. D’agost, canche l ie per l solit scialdi trafich pervia di truep turisc, se cunzentrerà i lëures de Terna dantaldut sun la stredes segonderes o sun raions vërc che ne nteressea nia diretamënter l trafich prinzipel.
L assessëur provinziel per la Mubiltà, Daniel Alfreider, à segurà che i lëures unirà dejëuc te n coordinamënt strënt cun l Servisc stredes dla Provinzia y che, sce l ne fossa nia mesun schivé nteruzions dl trafich, unirà chësc riesc comunicà.
Clican chiló röiun ala verjiun originala dl comunicat stampa por visualisé imajes, documënc o video che taca lapró
ir
