Svilup dl plurilinguism tla scora elementara: Presentaziun di resultac
Mercui, ai 9 de agost, a Balsan, él gnüda a se dé la presentaziun di resultac dl proiet “MELA-Mehrsprachig Ladinisch” (plurilinguism ladin) söle svilup global dl plurilinguism tla scora elementara.
La presentaziun é gnüda daorida dai salüc dl assessur provinzial por la Formaziun y Cultura ladina, Daniel Alfreider, che á rengrazié dla scomenciadia orüda y portada tres dala Intendënza ladina, y á detlaré che la scora ladina pó ester brauia de so model pluringuistich, deache ara é la sora buna da porté düc trëi i lingac ufiziai dla provinzia söl medemo livel.
Al é spo gnü le salüt dla intendënta ales scores y scolines ladines, Edith Ploner, che á rengrazié i sostegnidus dl proiet - dantadöt la Regiun Trentin-Südtirol y la Provinzia autonoma da Balsan - y düc i colaboradusc che á lauré para al proiet. Ara á spo recordé che al gnará fora na picia publicaziun cun i resultac, por stlü jö le proiet. L’intendënta á dainultima sotrissé la valüta dla inrescida, deache ara posizionëia la scora ladina y so sistem paritetich te n ambit scientifich internazional.
La parora é insciö passada ala professuria dl’université da Desproch, Ulrike Jessner-Schmid che á naota recordé les fondamëntes scientifiches sön chëres che le proiet de inrescida é pié ia (i stüdi söles competënzes plurilinguistiches é piá ia ala fin di agn 80 dl Nücënt, mo ai s’á svilupé dassën impormó do i agn 2000), por passé spo a lí y comenté i resultac dla inrescida, che á metü man l’ann 2021 y é jüda inant cina le 2023.
Bele ti agn 2017-2019 ê na te sort de inrescida gnüda fata tles scolines dla Val Badia y Gaerdëna por inrescí le potenzial dl svilup cognitif di pici mituns y mitans che vir te n contest pluringuistich. Tres l’osservaziun de 224 mituns y mitans dla scolina, êl gnü confermé che les competënzes linguistisches aumentëia canche an mëss se confronté cun deplü lingac. Ince i resultac dla secunda inrescida che la professuria Jessner-Schmid (en colaboraziun cun la Mag. Emese Malzer-Papp y le Mag. Christian Ederer) á en chësc iade fat sura mituns y mitans dala 3^ ala 5^ classa dles scores elementares confermëia che les competënzes y les conescënzes ti lí, baié y scrí n lingaz é scialdi majeres canche an impara deplü lingac. La condiziun de plurilinguism comporta porchël plü vantaji, nia ma tl contest dl aprendimënt scolastich, olache la cosciënza dl funzionamënt di lingac crësc dassën, mo direto tla vita da vigni de, a livel de comunicaziun interpersonala y de bëgnester sozial.
Danter i passaji plü importanc dla relaziun dla professuria Ulrike Jessner-Schmid él che les osservaziuns scientifiches desmostra che l’educaziun plurilinguala bonorida á efec dër positifs dal punt de odüda dl svilup cognitif. Y che le plurilinguism é dagnora deplü co la soma de dui o trëi lingac. Chësc, deache te ne contest plurilinguistich röia i lingac demeztrú en contat y se influenzëia un cun l’ater. Porchël, se dé jö cun manco lingac ne ti portass degun vantaje al’imparé n lingaz su. Les porsones che baia deplü lingac svilupëia competënzes che vá sura la conescënza dl lingaz su (traslaté, fá mediaziun, passé da un n lingaz al ater).
Le plurilinguism favorisëia la creativité: chi che baia deplü lingac á plü competënzes, cun capacités nöies y desvalies, che vá sura le savëi da baié le lingaz fora.
La professuria Jessner-Schmid á metü man cun le dí ci obietifs che la inrescida s’â metü dant: capí damí le prozes dl baié y dl ponsé ti mituns y tles mitans che rajona deplü lingac, n iade che che ai é rová tla scora elementara. Y reconësce les relaziuns che vëgn a se dé danter l’imparé i lingac te scolina y le svilup dles competënzes dl lí y dl scrí te scora. Sön la basa de chisc dac, spo, él meso da lauré fora les bases de n sostëgn miré por mituns y mitans che á val’ dificolté tl imparé i lingac.
Le stüde á revardé 6 scores cun 66 mituns/mitans te Val Badia y 3 scores cun 77 scolari/scolares te Gherdëna (tut ite él gnü ince le proiet pilot de Runcadic).
I mituns/mitans tuc en conscideraziun ê partis sö danter 3^ y 4^ classa y danter 4^ y 5^ classa. Por la validité scintifica dla inrescida él gnü chirí fora n grup de confrunt, che ê rapresenté dala scora elementara todëscia de St. Andrä (13 mituns/mitans).
Dal punt de odüda metodologich, é i ámbic de conescënza y de lingaz analisá chi che reverda le svilup cognitif general, la competënza linguistica tl tó sö (letüra te 3 lingac), la competënza linguistica tl prodüje (scrí/baié te 3 lingac), la competënza metalinguistica y la conescënza dl lingaz inglesc.
Tl prozes de valutaziun dles competënzes linguistiches él gnü tigní cunt dl ambiënt linguistich di mituns/mitans, dl contest linguistich di geniturs, tan co dles competënzes linguistiches, dla conscideraziun dl lingaz da pert di geniturs, y ince dla conscideraziun dl lingaz y di comportamënc di insegnanc/insegnantes.
Atenziun particolara é gnüda metüda ince söla Working Memory, tan co söl svilup cognitif general di mituns/mitans, mosoré söla basa dla capazité de prodüje definiziuns a usc, tl ladin, talian y todësch (adorvanza de sinonims, formulaziun dl significat dles parores), y de scrí y lí stories ilustrades scrites ti trëi lingac (conescënza dl lessich, capacité da cunté sö i contignüs dles stories, adorvanza de frases complesses).
La professuria Jessner-Schmid é spo jüda ite tla spligaziun dles competënzes metalinguistiches, chëres che vëgn fora dala osservaziun di scolari/scolares che é tl imparé le lingaz inglesc te n contest pluringual, y che röia plan plan da avëi na cosciënza nöia di sonns dl lingaz nü, y che laora fora strategies personales tl imparé, se daidan cun i atri lingac. Chësc vel dantadüt tl ciamp dla traduziun y dla produziun de situaziuns linguistiches reales, da vigni de (por ejëmpl, comuniché cun i compagns). Ince la competënza digitala á ciafé süa mosoraziun y süa valutaziun.
Tl trá adüm i resultac dl proiet MELA y porvan da dé inant n cheder general dla inrescida, podunse dí che i mituns y les mitans se svilupëia tresfora dal punt de odüda cognitif, y che la memoria de laur é zënz’ater miú ti mituns pluringuai. Mituns y mitans plurilinguai mostra sö tres indô n livel plütosc alt tles competënzes linguistiches dl tó sö y dl prodüje (te düc trëi i lingac). La conscideraziun positiva ti confrunc dl lingaz ladin romëgn alta, sides ti mituns/mitans che ti geniturs. Tl confrunt dles competënzes danter i lingac (tl contest scolastich) slisora le ladin al ultim post, superé dal talian y dal todësch. Mituns y mitans dles scores ladines arjunj resultac cotan mius, o almanco anfat, tl ciamp dles competënzes de letöra, dla produziun scrita y dla creativité (por ejëmpl tles defiziuns a usc) respet al grup de control. Les competënzes tl lingaz talian (scrit y a usc) é tles valades ladines, dantadöt te Gherdëna, tlermënter plö svilupades respet al grup de control, deperpo che le lingaz inglesc se svilupëia inant bun anfat ti raiuns analisá. Porchël é le livel dles competënzes plurilinguistiches tles scores ladines scialdi alt. Mo sambëgn, ara vá debojëgn da implementé i resultac y les indicaziuns dl’inrescida tla pratica didatica, y al foss dërt porté inant la inrescida tla scora mesana.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red
