Marciapisc nü a La Val: L’assessur Alfreider söl post
Danter Ciampló y Lunz é i laurs de sistemaziun dla strada rová a piz. L’assessur provinzial á tut pert al’inauguraziun.
I laurs söl percurs dla LS 60 é sëgn ruvá. Al é gnü slarié la strada y al é gnü realisé n toch de marciapisc nü, lunch 972 metri. I intervënc é gnüs a se dé por garantí na maiú segurëza y por ti fá plü lerch ai auti y ales corieres, canche ai s’incunta. Por podëi realisé le marciapisc él gnü sposté i vedli mürs sön ur de strada, y al n’un é gnü fat sö de nüs. I laurs â metü man tl mëis de novëmber 2020, y al ê porchël gnü l’ora da inauguré y da benedí le toch de strada nü.
"Por ti garantì na buna cualité dla vita ai abitanc dles viles vára debojëgn de infrastrotöres che passenëia. De de te infrastrotöres ó dí strades plü sigüdes" á splighé l’assessur provinzial Daniel Alfrëider pro l’inauguraziun dla strada y dl tretuar nüs. "Poi i abitanc dles viles che se sposta a pe y che mëss arjunje les fermades dla coriera, rapresentëia chësc marciapisc n gran vare inant tl vers dla sigurté" á injunté Alfreider, alzan fora la buna colaboraziun cun le comun da La Val.
L’umbolt da La Val, Angel Miribung, á rengrazié i rapresentanc dla Provinzia por le sostëgn che ara á dé tla realisaziun de chësc toch de strada, che é de gran valüta. Ince ël á sotrissé le fat che le marciapisc porta pro a na buna cualité dla vita, nia ma tles viles interessades mo te düt le comun.
Indöt á i laurs custé 2.347.115,42 de euro. Al é gnü slarié la strada, sciöch’ dit, y fat le parciapisc, mo implü él ince gnü metü jö condütes nöies, fat tombins y condütes por l’ega dla plöia, implí i rogns sön ur de strada, metü jö n funz de strada nü y l’asfalt. Insciö á dit le geometer Andrea Pozza.
Clican chiló röiun ala verjiun originala dl comunicat stampa por visualisé imajes, documënc o video che taca lapró
pt/cs
