Sëlva: scunanza de monumënt per la stala dl luech "Col dala Pelda"
Te Sëlva vën l tublà dl luech da paur „Col dala Pelda“ metù sot a scunaza architetonica ndrëta. Chësc ie unì fat ora dala Jonta provinziela sun pruposta dl Ufize per la scunanza di bënns culturei.
L tublà dl luech da paur "Col dala Pelda" te chemun de Sëlva vën metù sot a scunanza architetonica. Chësc à fat ora (ncuei) ai 23 de auril la Jonta provinziela sun pruposta dl assessëur cumpetënt per la cultura Philipp Achammer. Danora ova bele l Ufize per la scunanza di bënns culturei atestà che l se trata de n frabicat de nteres culturel. La patrona ova dan puech dit de vester a una cun l cunvenziunamënt provinziel de scunanza architetonica. Sun chëla à la Cunservatëura provinziela Karin Dalla Torre nvià via la pruzedura per mëter l tublà sot a scunanza ndrëta de bënn architetonich.
Sce n ti cëla ala fazion che l turism à te Gherdëina de viers dla sustanza architetonica storica, iel tler che l ie de mpurtanza patriculera che l vënie mantenì frabicac vedli y de relevanza storica,“ nscila l assessëur cumpetënt per la cultura Philipp Achammer: "Dlongia i aspec de mantenimënt architetonich, estetich y ambientel iel for nce da tenì cont dla gran mpurtanza culturela y storica che de tei frabicac à."
La Cunservatëura provinziela Karin Dalla Torre dà da lecurdé che "la cësa da sté dl luech da zacan 'Col dala Pelda' fova bele unida metuda sot a scunanza tl ann 1982. Sën slargions ora la scunanza architetonica a dut l ensemble. Nscila ie tl daunì dut l luech da paur, cun la cësa da sté tl sudest y cun l tublà a nordovest, sot a scunanza architetonica." La Cunservatëura provinziela auza ora che "tramedoi i frabicac ie unii fai su ala fin dl 17ejim secul: la cësa da sté danter l 1683 y l 1688 y puech do, danter l ann 1689 nchin al ann 1693, la stala". Chësc à mustrà su la mesurazions dendrocronologiches dla strutures de lën de tramedoi i frabicac.
L tublà che vën sën metù sot a scunanza à na gran fundamënta retangulera de sas cun la strutura de lën dessëura. La stala ie tl partimënt dessot. L tublà de doi partimënc ie unì fat cun i ciucs turonc un sëura l auter, cun n bel palancin ntëur duta la cater pertes dla strutura. La scrita "BM BLM 1693 IHS-Maria" va a una cun i resultac dla dendrodatazion.
Clican chiló röiun ala verjiun originala dl comunicat stampa por visualisé imajes, documënc o video che taca lapró
jw
