Se n sté bën sun la luegia de lëur: laurà ora na charta deberieda
I Cumitac de Garanzia Unics dla Provinzia, dl Servisc Saniter, di Chemuns de Bulsan y de Maran y dla Università Liedia à laurà ora diretives deberieda per l bënsté sun la luegia de lëur
De mei dl ann passà fòvel n ucajion dl cunvëni "Lëur tl mudamënt: jì pea cun suzes cun la ndesfidedes di tëmps" unì nvià via n pruzes per l’elaurazion de na charta deberieda per l bënsté sun la luegia de lëur. Ntlëuta fòvel unit adalerch 400 partezipantes y partezipanc - dut cunlauradëures de liviei desferënc dl’aministrazion publica – che ova dat l input de lauré ora diretives deberieda.
La uferta de n ambient de lëur sann, da sté saurì y che nvieia a sté, la determinazion de traverc de lëur tleres y esplizic che vën pona da dedò nce metui n droa te na maniera cuerënta, l recunescimënt y l sustëni dla capaziteies y di cuntribuc di/dla cunlauradëures: chisc ie n valguni di prinzips de basa che na urganisazion tuchëssa de tenì ite per mantenì y sustenì l bënsté pra la luegia de lëur.
La charta ie ntant unida fata y nce publicheda tla trëi rujenedes provinzieles ufizieles. N possa la liejer sun la plates internet di Cumitac de Garanzia resp. dla Consulta per la Valivanza dla Rejons dl’Università Liedia de Bulsan. Tla plata internet dla Provinzia ie la charta da abiné sun https://www.provinz.bz.it/verwaltung/personal/downloads/Charta_LA_Autonoma_Provincia_di_Bolzano_Alto_Adige_def.pdf
I Cumitac de Garanzia Unics dla Provinzia per la valivanza di dërc, l svilup dl bënsté di/dla cunlauradëures y contra la descriminazion tl’aministrazions publiches fova unii metui su cun lege nr. 183 di 4 de nuvëmber dl 2012. Si ncëria ie chëla de garantì n ambient de lëur che sibe determinà dal mantenimënt dla valivanza dla rejons y dl bënsté urganisatorich, y oradechël de ti jì contra a uni forma de descrimiminazion y de viulënza morala y psicologica.
Clican chiló röiun ala verjiun originala dl comunicat stampa por visualisé imajes, documënc o video che taca lapró
ck
