L ie unì prejentà l servisc de previjion meteo Euregio
La previjions meteo unirà damoinla prejentedes te na maniera unitera y avisa te dut l raion dla Euregio Tirol-Südtirol-Trentin. L pieta truep vantajes, da coche l ie unì dit pra l’ancunteda dl’Euregio
Per la previjions meteo te dut l raion dla Euregio Tirol-Südtirol-Trentin saràl damoinla l servisc dl’Euregio de previjion meteo nuef y uniter. De gra ala cunlaurazion cun i servijes de previjion meteo iel a despusizion i dac de duta la stazions meteo tl raion dl’Euregio. Chësc lascia pro previjions prezijes, liedes al raion spezifich y de trëi ëura danora – da udëi online sun meteo.report per nglëisc, tudësch y talian y sun la plata internet dl’Euregio. La previjions meteo cumeneles unirà nce metudes ite tla plata internet dl tëmp de Südtirol y sun meteotrentino.
L servisc de previjion meteo ie unì prejentà ai 14 de juni tl Cunvënt beneditin de Marienberg tla Venuesta, ulache l diretif y la aduneda dl’Euregio à abù si prima senteda dla presidënza de Südtirol.
L presidënt Euregio y presidënt dla Jonta provinziela de Bulsan Arno Kompatscher: “Te na luegia storica giaurions n capitul nuef dla previjions meteo, cun n plusvalor per duc y dutes che viv, lëura o passa si tëmp liede tl raion dla Euregio Tirol. Oradechël vijualisea la cherta meteo l’Euregio nce geograficamënter.“
Do la fasa pilota finanzieda tres l program UE Interreg dal inuem TINIA à l’Euregio sëurantëut l pruiet per ti sëurandé la realisazion ala Scunanza Zevila dl Trentin; l presidënt trentin Maurizio Fugatti: "Danter l auter iel nscila stat mesun mëter a despusizion l servisc de previjion de livel cumenel, coche bele praticà tl Trentin, nce te Süd- y Nordtirol.” Chësc ti va a bën de duc chiche à debujën de dac meteo avisa te si raion, à spiegà l presidënt dl Tirol Anton Mattle: "N pënse ala scunanza zevila y nscila ala segurëza dla jënt, ala pauraria y al turism.”
La particulariteies mët a despusizion i cumëmbri dla grupa de lëur cun Erica Cova y i diretëures di ufizies cumpetënc y servijes, Bruno Bevilacqua (Trentin), Michela Munari (Südtirol) y Klaus Niedertscheider (Tirol). Nscila iel na previjion meteo per i crëps danter 1.500 y 3.000 metri de autëza. Oradechël iel da udëi i dac dla stazions meteo y la situazions atueles tres la webcams.
Marienberg: scrit su l tëmp dal 1856 incà
Dal 1856 incà nota i patres su la temperatura, tant che l pluev y l nëiv y l’autëza dla nëif. L ie i scric meteo ufiziei plu vedli te dut l Tirol tudësch. Da coche à dit Pater Anselm Krieg y Günther Geier (Ufize per Meteorologia y Levines) ie chësta lingia de mesurazions zënza nteruzion tl raion dl’Euregio danter l auter nce mpurtantes per la nrescida dl tlima.
Clican chiló röiun ala verjiun originala dl comunicat stampa por visualisé imajes, documënc o video che taca lapró
gst/dl
