Do la mort dl umbolt, toma le Consëi de Comun
Do la mort tragica dl umbolt Angel Miribung, á le guern provinzial deslié le Consëi de Comun da La Val. L’inciaria da umbolt vëgn surantuta da so vize, cina a lites nöies.
L’umbolt Angel Miribung é mort en jöbia, tla Svizera, toman jö da n crëp. Incö, mertesc ai 2 de messé, á messü le guern provinzial deslié la Junta y le Consëi de Comun, sciöche al é preoadü dal ordinamënt regional. N decret dl Presidënt dla Provinzia confermëia le provedimënt. Sides la Giunta co le Consëi laorará inant cina ales lites nöies. L’inciaria da umbolt vëgn surantuta da so vize, Felix Dapoz, y tl cajo de assënza o de val’ impedimënt da pert süa, gnará la inciaria surantuta dal mëmber plü vedl dla Junta.
Dodí dla lege regionala, dess les lites dl Consëi nü gní tignides danter le 1° de novëmber y le 15 de dezëmber. Le mandat jará spo inant cina al 2030, deache les lites é gnüdes tignides n ann denant dles atres lites comunales.
Angel Miribung ê umbolt da La Val dal 2015 inant. Deant êl sté mëmber dl Consëi y vize assessur y al s’â dé jö cun gran impëgn por i debojëgns di zitadins. Pornanche la noela dla mort de Miribung s’â slarié fora, ti á le Presidënt dla Provinzia Arno Kompatscher sport les conolianzes ai familiars.
Clican chiló röiun ala verjiun originala dl comunicat stampa por visualisé imajes, documënc o video che taca lapró
pio/cs
