Ejam scores secundares de pröm degré tles valades ladines: resultac
Düc i 230 candidac y candidates che ê scric ite ala terza mesana dl ann scolastich 2023/24 é gnüs ametüs y ametüdes, 229 á completé y superé l’ejam.
L’ejam de Stat dl pröm ziclus é gnü stlüt jö ai 30 de jügn. Düc i 230 candidac y candidates che ê scric ite ala terza mesana dl ann scolastich 2023/24 é gnüs ametüs/ametüdes y, 229 á completé y superé l’ejam. Por n candidat su vára ciamó debojëgn da abiné fora n termin por la pert orala cina la plü tert ai 31 d’agost.
Tles scores secundares de pröm degré dles valades ladines él preodü cin’ proes scrites y n colloquium.
119 scolars y scolares á passé l’ejam de stat tles trëi scores secondares de pröm degré dla Val Badia. De chisc á 2 (1,68%) passé l’ejam cun voto 10 cum laude, 7 (5,88%) cun voto 10 y 22 (18,84%) cun voto 9. 49 candidac y candidates (41,17%) á passé l'ejam cun voto 8, 27 (22,68%) cun voto 7 y 12 (10,08%) cun voto 6.
110 scolars y scolares dles döes scores secondares de pröm degré de Gherdëna á passé l'ejam de Stat. 5 (4,54%) de chisc á passé l’ejam cun voto 10 cum laude, 2 (1,81%) á ciafé 10 y 24 (21,81%) á ciafé 9. 35 (31,81%) candidac y candidates s’á diplomé cun 8 y 38 (34,54%) cun voto 7. 6 (5,45%) candidac y candidates á passé l’ejam cun voto 6.
En total á 84 (36,68%) scolars/res dles cin’ scores secundares de entrames les vals ladines ciafé 8. 65 (28,38%) á ciafé 7, tratan che 46 candidac y candidates (20,09%) á arjunt 9. 18 (7,86%) scolars y scolares á superé l’ejam final cun voto 6, 9 (3,93%) cun 10 y 7 (3,06%) cun voto 10 cum laude.
En confrunt al ann de scora 2022/23 él sté na picera diminuziun di voti 8 y 9 y n pice aumënt di voti 10 cum laude y 10 y 7.
L’assessur por l’Istruziun, Formaziun y Cultura ladina Daniel Alfreider é dër contënt cun i resultac arjunc: "I me congratulëii cun i scolars y les scolares por le completamënt ezelënt dla scora secondara de pröm degré. Ai pó ester braui cun sü resultac y ai dess se gode l’isté y sües vacanzes. I rengrazi nüsc insegnanc y nostes insegnantes por döt so impëgn tratan l’ann de scora y che ai arjigna ca i scolars y les scolares cun paziënza y pasciun y tla miú manira poscibla por ti ester al ejam. Ai y ares ne trasmët nia ma savëis, mo ai motivëia y sostëgn scolars y scolares, deboriada cun sües families y ti pormët insciö da realisé döt so potenzial."
La direturia dla Direziun, Formaziun y Cultura ladina Edith Ploner vëiga cun sodesfaziun i resultac arjunc, "deache ai desmostra che scolars/res vëgn incorajá da svilupé sü punc de forza y sü talënc por ester arjigná tan bun che ara vá y rové inant tla scora secundara de secundo degré o tl sistem d’istruziun y formaziun profescionala".
Clican chiló röiun ala verjiun originala dl comunicat stampa por visualisé imajes, documënc o video che taca lapró
red
