Dis dl’Euregio: sëurandat l Pest Tuadëures Jëuni 2024
L miëur de tué do y de fé nrescides dl’Euregio ie Ariele Zanfei dla Unibz. I autri doi pesć ti ie unii dac a espunënc dla Universiteies de Trënt y de Dispruch.
Alpbach/Tirolo (USP). I miëur pruiec de nfrusceda, tueda y nrescida n con’ dla tematica “La nteligënza artefiziela tl’Euregio” ie unii crisc ora n sada ai 17 de agost tl cheder di Dis dl’Euregio urganisei tl Zënter Cungresc de Alpbach tl Tirol.
Danter i/la sies che ie ruvei te finela dl 13ejim Pest Tuadëures Jëunes/i dl’Euregio, se à tlassificà al prim post Ariele Zanfei de Aiaqua Unibz spin-off cun n pruiet n con’ dla previjion dl anuzamënt dl’ega che l sarà tl daunì te rëies dal’ega. L segondo pest ti ie unì dat a Roberto Andreotti dla Università de Trënt, ntan che l terzo miëur pruiet ie chël che ie unì prejentà da Nadja Gruber dla Università di Dispruch.
I pesc, dac ora dala Cameres de Cumerz dl Tirol, de Bulsan y de Trënt, ie unii sëurandac da Barbara Thaler, presidënta dla Camera de Cumerz dl Tirol, y da Michl Ebner, presidënt dla Camera de Cumerz de Bulsan, prejënc pra la zeremonia deberieda cun l presidënt dl'Euregio y dla Provinzia de Bulsan Arno Kompatscher, l capitan dl Tirol Anton Mattle y l assessëur dla Provinzia de Trënt Simone Marchiori.
Tres ideies, tecnologies y strategies nueves porta nscila la nfrusceda y nrescida pro te na maniera scialdi sterscia al svilup dl’economia dl raion, da coche à detlarà Ebner: “Chësc vel dantaldut per la nteligënza artefiziela, che va ite y à for plu y plu pëis te na cumpëida for majera y majera de setores.” Thaler à auzà ora che "la soluzions tecnologiches ie scialdi mpurtantes per la aziendes dl'Euregio. Propi perchël nes stajòvel dassënn a cuer che l unissa dat scioldi per l Pest Tuadëures Jëunes/i dl’Euregio.”
A cë dla iuria la presidënta dl’Università Liedia de Bulsan, Ulrike Tappeiner, che à sotrissà la fazion y l pëis dla nrescida: “L anuzamënt sustenibl dl’ega, i stress-test dla nfrastrutures y i ndicatëures sozio-culturei ie ubiec de studi de n livel de ezelënza.”
L Pest Tuadëures Jëunes/i dl’Euregio prevëija n recunescimënt de scioldi de 5.000, 2.500 y 1.000 euro per i prims trëi tlassifichei. Pra l’edizion 2024 se àl candidà 44 tuadëures de na età sot ai 35 ani de pruveniënza dal'Euregio Tirol-Südtirol-Trentin o che lëura pra n istitut de nfrusceda y tueda cun sënta tl’Euregio. I pruiec pudova avëi a cie fé cun desziplines scientifiches desferëntes y revardé aspec generei dla nteligënza artefiziela, ma nce aspec etics y aministratifs, nsci coche nce ciamps de aplicazion spezifics coche la mubltà, l’istruzion y l’assistënza.
Clican chiló röiun ala verjiun originala dl comunicat stampa por visualisé imajes, documënc o video che taca lapró
gst/dl
