Ejam de ladin: Seleziun di comëmbri dles comisciuns d'ejam
Prozedöra de seleziun por la nominaziun di comëmbri y dles comëmbres dles comisciuns d'ejam de ladin 2025-2029 - Domanda d'amisciun cina ai 15 d'otober dl 2024 al Comissariat dl Govern
BULSAN (USP). Les porsones interessades pó da atira inant damané da gní scrites ite tla lista di aspiranc comëmbri y dles aspirantes comëmbres dles comisciuns por l'azertamënt dla conescënza dl lingaz ladin.
L'acordanza sön l'inviada ia dla prozedöra de seleziun por la nominaziun di comëmbri y dles comëmbres dles comisciuns d'ejams por l'azertamënt dla conescënza dl lingaz ladin por i agn 2025-2029 é gnüda sotescrita dal Comissar dl Govern dla provinzia de Balsan, le prefet Vito Cusumano, y dal presidënt dla Provinzia Arno Kompatscher, y vëgn publicada ai 18.09.2024 tl Boletin Ofizial, n. 38. Le mandat da sëgn se röia ala fin dl 2024.
Condiziuns d’azes
Al vëgn chirí altamo ot comëmbri y comëmbres dles comisciuns d'ejams, y plü avisa altamo cater por l'idiom dla Val Badia y altamo cater por l'idiom de Gherdëna.
Les condiziuns por tó pert ala prozedöra de seleziun é: la portignënza o l'agregaziun al grup linguistich ladin, n diplom universitar (stüde universitar de altamo cater agn), l'atestat de conescënza di lingac talian, todësch y ladin C1 (l'ejam de ladin fat dan la comisciun nominada dala junta provinziala por l'ejam de ladin dl'Intendënza ladina vëgn ecuiparé) y na formaziun linguistica o n'esperiënza profescionala ti lingac talian, todësch y dantadöt ladin. Implü mëss i aspiranc comëmbri y les aspirantes comëmbres detlaré da ester a öna da fá l'ativité altamo 2 dis intiers al mëis.
I comëmbri y les comëmbres dles comisciuns d'ejam vëgn chiris fora aladô di titui de prezedënza.
Formulars y termin de presentaziun
L'acordanza, i criters por la seleziun y la nominaziun di comëmbri y dles comëmbres dles comisciuns d'ejam y le formular da fá domanda pó gní desciariá sön la plata internet dl Comissariat dl Govern y sön la plata internet dl Sorvisc Ejams de bi-y trilinguism.
La domanda d'amisciun ala prozedöra de seleziun é da scrí fora aladô dl model injunté y da dé jö cina ai 15 d'otober dl 2024 al Comissariat dl Govern.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red/san
