I 23 de setëmber ie l Di dla "Furmazion tl luech"
De ndut iel te Südtirol 145 cunsëies de furmazion che ie atifs – Na jita de furmazion a San Martin de Tor urganiseda dal Ufize per la Furmazion y la Rujenedes à ulù judé a renfurzé l lëur de rë
BULSAN (USP). Da ot ani incà iel ai 23 de setëmber l Di di Cunsëies de Furmazion. L dëssa mustré su l lëur de ulentariat per la furmazion y la cultura ti Chemuns y ti luesc. De ndut iel te Südtirol 145 cunsëies de furmazion, cun 900 persones che se dà ju, cun mpëni y a livel de ulentariat, a bën dl lëur de furmazion tla rujenedes ladin, talian y tudësch.
I cunsëies urganisea tl luech, deberieda cun lies y urganisazions, manifestazions, referac, descuscions y prejentazions de libri, mët a jì zaites de paesc o dis tematics. L’ativiteies y la tematiches ie d’uni sort, avisa sciche la jënt che lëura ti cunsëies de furmazion.
Renfurzé la cumenanza
Fé che la jënt ruve adum y che l sibe n barat soziel y logistich ie ncëries di cunsëies de furmazion. Per sustenì mo deplù la cunlaurazion te na rë da pert di cunsëies de furmazion te duta la provinzia de Bulsan, mët l Ufize provinziel per la Furmazion y la Rujenedes a jì uni ann na jita de furmazion. Chëst ann iela jita a San Martin de Tor, n sada ai 21 de setëmber. Michael Moling à menà la grupa tres l parch artistich "SMACH.Val dl’Ert", spiegan l cunzet dl pruiet y dut chël che ie dovia. Domesdì à l Istitut Culturel Ladin Micurà de Rü pità na ntroduzion tla rujeneda ladina, te na maniera dalaibon y da fé damat. Jì a pe y maië deberieda ti à dat l mesun a chiche à fat pea de se giamië esperienzes y minonghes, sibe danter i cunsëies de furmazion che cun i respunsabli y la respunsables di ufizies raiunei de servisc y la y i cunlauradëures dl Ufize de Furmazion.
Nfurmazions n con’ dla manifestazions y dl lëur di cunsëies de furmazion iel da abiné sun la plates facebook di cunsëies singuli o sun la plata internet provinziela www.provinz.bz.it/weiterbildung/bildungsausschüsse.asp.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red
